ՀԱՅԱՍՏԱՆԻ 4 ՄԱՐԶԵՐՈՒՄ ՄՕՏ ՕՐԵՐՍ ԿՍԿՍՈՒԻ ԳԻՒՂԱԿԱՆ
ՃԱՆԱՊԱՐՀՆԵՐԻ ՎԵՐԱՆՈՐՈԳՈՒՄԸ
08-09-2008 19:56:00 | Հայաստան | Տնտեսութիւն
ԵՐԵՎԱՆ, 8 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեպտեմբերի 8-ին ՀՀ
Ազգային Ժողովը վաւերացրեց 2006-07թթ.-ին ֆինանսների եւ
էկոնոմիկայի նախարարութեան եւ Ասիական զարգացման բանկի միջեւ
կնքուած համաձայնագիրը` գիւղական ճանապարհների վերականգման ծրագրի
իրագործելիութեան ուսումնասիրութիւն կազմակերպելու համար
նախատեսուած փոքրածավալ տեխնիկական օժանդակության մասին: Ինչպէս
նշեց ՀՀ տրանսպորտի եւ կապի նախարար Գուրգէն Սարգսեանը, փոքրածավալ
տեխնիկական օժանդակության գումարը կազմում է 150 հազար ԱՄՆ դոլար:
Ինչպէս «ՆՈՅԵԱՆ ՏԱՊԱՆ»-ի թղթակցի հետ զրոյցում նշեց
Գ.Սարգսեանը, Ասիական զարգացման բանկի կողմից ֆինանսաւորւող
հիմնական վարկային ծրագրով նախատեսւում է վերականգնել մօտ 220 կմ
ընդհանուր երկարությամբ 10 ճանապարհահատուածներ Կոտայքի, Արարատի,
Գեղարքունիքի եւ Արմաւիրի մարզերում: Հիմնական վարկի գումարը
կազմում է 30,6 մլն դոլար:
Խորհրդատուն, որին վարձել է Ասիական զարգացման բանկը, կատարել
է վարկի յատկացման, ինչպէս նաեւ գիւղական ճանապարհների
վերականգնման ծրագրի տեխնիկական առաջադրանքի նախապատրաստական
աշխատանքները: Արդիւնքում նշուած ճանապարհահատվածներն ընդգրկուել են
բանկի կողմից ֆինանսաւորւող հիմնական վարկային ծրագրում: Հաւելեալ
150 հազար դոլարը տրամադրվել է որպէս երկրորդ տնխնիկական
աջակցութիւն, որի միջոցով իրականացուել են վերոհիշյալ ճանապարհների
վերականգնման նախագծման աշխատանքները:
Նախարարը վստահեցրեց, որ ծրագրի իրականացման աշխատանքները
կսկսուեն մօտ օրերս` ֆինանսավորումը սկսուելուց անմիջապէս յետոյ:
Ծրագրի նախապատրաստման հիմնական փուլերն աւարտուած են, կան փոքր
տեխնիկական խնդիրներ, որոնք այս պահին համաձայնեցւում են Ասիական
զարգացման բանկի հետ: Ծրագրի առաջին փուլում նախատեսւում է
վերանորոգել 109 կմ ընդհանուր երկարությամբ ճանապարհահատուածներ:
Ծրագրի աւարտը նախատեսուած է 2010թ.-ին: