«DIGITEC BUSINESS» ԵՐԿՐՈՐԴ ՀԱՄԱԺՈՂՈՎՆ ՈՒՆԵՑԵԼ Է ՇՈՒՐՋ 1 000
ԳՐԱՆՑՈՒԱԾ ԱՅՑԵԼՈՒ
02-07-2008 18:02:00 | Հայաստան | Տնտեսութիւն
ԵՐԵՎԱՆ, 2 ՅՈՒԼԻՍԻ, ՆՈՅԵԱՆ ՏԱՊԱՆ: Երեւանում յունիսի 26-27-ին
անցկացուած «DigiTec Business» երկրորդ համաժողովն ունեցել է 1 000
գրանցուած այցելու` սպասուած 1 500-ի փոխարէն, եղել են նաեւ 200-ից
աւելի ոչ գրանցուած այցելուներ: Սակայն, համաժողովին տեղեկատուական
եւ հեռահաղորդակցության տեխնոլոգիաների լուծումներ առաջարկող 17
ընկերութիւնների ներկայացուցիչների գնահատմամբ, համաժողովի
արդիւնքները գոհացուցիչ են, քանի որ այդ ընկերութիւնները կնքել
են բազմաթիւ պայմանագրեր: Այս մասին յուլիսի 2-ի ասուլիսում
յայտնեց Հայաստանի Ինֆորմացիոն տեխնոլոգիաների ձեռնարկութիւնների
միութեան (ԻՏՁՄ) գործադիր տնօրէն Կարեն Վարդանեանը:
Նա նաեւ նշեց, որ համաժողովի շրջանակներում անցկացուած կլոր
սեղանները, գործարար ներկայացումները յաջող են անցել. այդ
միջոցառումներին մասնակցել են տարբեր ոլորտների ընկերութիւնների
20-30 ներկայացուցիչներ:
Կ.Վարդանեանը յաւելեց, որ համաժողովի ժամանակ դրսեւորվել է ոչ
ՏՀՏ ոլորտի ձեռնարկութիւններից այցելուների գործարար հաղորդակցման
ցածր մակարդակ, երբ նրանց էական մասը իրենց ժամանակը վատնել են
«ծանոթների հետ զրուցելու» համար: Նշուեց, որ այցելուների հետ
գործարար երկխօսութեան խնդիրներ ունեն նաեւ ՏՀՏ ոլորտի
ընկերութիւնները, եւ դրանք լուծելու նպատակով այս տարի ԻՏՁՄ-ն
անցկացրել է մէկ դասընթաց, որը վարել է ԱՄՆ-ից հրաւիրուած
փորձագետը: Այդ դասընթացների թիւը կաւելանա, քանի որ, ըստ միութեան
գործադիր տնօրէնի, դրանք էապէս բարձրացնում են ցուցահանդեսներին եւ
գործարար համաժողովներին մասնակցութեան արդյուանվետությունը:
Երկրորդ «DigiTec Business»-ի համակազմակերպիչներն էին
Հայաստանի Բանկերի, Գործատուների միութիւնները եւ «Microsoft»
ընկերութեան հայաստանեան մասնաճիւղ «Microsoft RA» ընկերութիւնը:
Համաժողովի շրջանականերում կազմակերպուած «ՏՀՏ-ն առօրեայ
բիզնեսում» կոնֆերանսի եւ «Microsoft ինովացիոն ֆորում»-ի ժամանակ
անցկացուել են 15-ից աւելի բիզնես ներկայացումներ եւ զեկուցումներ,
ինչպէս նաեւ` դեղագործութեան, ֆինանսա-վարկային, առողջապահութեան,
փոքր եւ միջին ձեռնարկատիրութեան, բիզնեսի եւ պետութեան
փոխգործակցութեան ոլորտներում ՏՀՏ-ների ներդման եւ կիրառութեան
թեմաներով կլոր սեղաններ: