ԼԻԲԱՆԱՆՈՒՄ ՀԵՌԱՐՁԱԿՈՒՄԸ ԴԱԴԱՐԵՑՐԵԼ ԵՆ ԸՆԴԴԻՄԱԴԻՐ
ՀԵՌՈՒՍՏԱԱԼԻՔՆԵՐԸ
13-05-2008 18:25:00 | | Միջազգային
ԲԵՅՐՈՒԹ, 13 ՄԱՅԻՍԻ, ՆՈՅԵԱՆ ՏԱՊԱՆ: Երեքշաբթի Լիբանանի
հիւսիսում հեռարձակումը դադարեցրել են երեք ընդդիմադիր
հեռուստաալիքներ, հաղորդում է «Նովոստի» գործակալութիւնը`
վկայակոչելով լիբանանեան «Ալ-Մանար» հեռուստաալիքը:
Նշւում է, որ «Ալ-Մուստակբալ» շարժման կողմնակիցները
դադարեցրել են «Էն-Բի-Էն», «Ալ-Մանար» եւ «Օ-ՏՎ» հեռուստաալիքների
հաղորդումները: Հեռուստաալիքները պատկանում են համապատասխանաբար
շիա մահմեդական «Ամալ», «Հզբոլլահ» եւ «Ազատ հայրենասիրական
շարժմանը»:
«Էն-Բի-Էն»-ի Բեյրութի խմբագրութիւնում յայտարարել են, որ
իրենց յայտնի չէ հեռարձակման դադարեցման պատճառը, եւ ենթադրել, որ
կարող է անջատուած լինել ազդանշանն ընդունող կայանը:
Անցած շաբաթ ընդդիմութեան զինուած ջոկատները գրաւել եւ փակել
էին արեւմտյան Բեյրութում գտնուող էլեկտրոնային եւ տպագիր ԶԼՄ-ները,
որոնք պատկանում են խորհրդարանական մեծամասնութեան առաջնորդ Սաադ
Հարիրիին, ներառեալ մէկ արբանեակային եւ երկու սովորական
հեռուստաալիքներ, մէկ ռադիոկայան եւ «Ալ-Մուստակբալ» թերթը: