ՀԱՅԱՍՏԱՆՈՒՄ ՍՈՑԻԱԼԱԿԱՆ ԲԱՐԵՓՈԽՈՒՄՆԵՐԻ ԱՐԱԳՈՒԹԻՒՆԸ ՅԵՏ Է
ՄՆՈՒՄ ՄԱԿՐՈՏՆՏԵՍԱԿԱՆ ԲԱՐԵՓՈԽՈՒՄՆԵՐԻ ՏԵՄՊԵՐԻՑ
01-04-2008 20:26:00 | Հայաստան | Տնտեսութիւն
ԵՐԵՎԱՆ, 1 ԱՊՐԻԼԻ, ՆՈՅԵԱՆ ՏԱՊԱՆ: Հայաստանի 2008-09թթ.-ի
սոցիալ-տնտեսական քաղաքականութեան կարեւոր մաս է կազմելու
սոցիալական բարեփոխումների իրականացումը: Առայժմ սոցիալական
բարեփոխումների արագութիւնը յետ է մնում մակրոտնտեսական
բարեփոխումների տեմպերից: Կառավարութիւնը բազմաթիւ միջոցառումներ
է ձեռնարկել, որպէսզի երկրի տնտեսական աճն ուղղուի բնակչութեան
կենսամակարդակը բարձրացնելուն, սակայն հասարակութեան մէջ
անհաւասարութեան աճի, կրթութեան ու առողջապահական համակարգերի
վատթարացման միտումները շրջելու համար անհրաժեշտ են ռազմավարական
ներդրումներ: Այս եզրակացութիւնները ներկայացուած են ՄԱԿ-ի Ասիայի
եւ Խաղաղօվկիանոսեան տարածաշրջանի տնտեսական ու սոցիալական
յանձնաժողովի (ԱԽՕՏՏՍՀ) «Ասիայի եւ Խաղաղօվկիանոսեան տարածաշրջանի
տնտեսական ու սոցիալական հետազօտութիւն 2008»-ում:
Հետազօտութիւնում հիշեցվում է, որ 2007թ.-ին ՀՀ
կառավարութիւնն ընդունել է աղքատութեան նուազեցման հնգամեայ
քաղաքական ծրագիր, որով նախանշվում է դրա մակարդակը` այժմեան
30%-ից 2012թ.-ին հասցնել 12%-ի: Նշուվել է, որ աղքատութեան շեմից
ցածր եկամուտներ ունեցող մարդկանց թիւը 1988թ.-ի 55%-ից 2005թ.-ին
նուազել է մինչեւ 34%: Եկամուտների անհաւասարութեան չափման Ջինի
գործակիցը, որտեղ բարձր արժէքները ցոյց են տալիս եկամուտների
առաւել մեծ անհաւասարութիւն, 1996թ.-ին Հայաստանում կազմել է
44,42, իսկ 2003թ.-ին` 33,8: Այդուհանդերձ, եկամուտների
անհաւասարութիւնը շարունակում է մեծ խնդիր լինել երկրի համար:
Հետազօտութեան համաձայն, 2007թ.-ին Հայաստանը վեցերորդ տարին
անընդմէջ գրանցել է երկնիշ տնտեսական աճ եւ մնացել աշխարհի
ամենաարագ զարգացող երկրների շարքում: Երկրի ՀՆԱ-ն 2007թ.-ին աճել
է 13,8%-ով: Հայաստանում ՀՆԱ-ի աճի գլխաւոր գործօններն են համարուել
շինարարութիւնը, գիւղատնտեսութիւնը եւ ծառայութիւնների ոլորտը:
Շինարարութեան աճն արագացել է արդիւնաբերական արտադրութեան եւ
բնակելի ու գրասենեակային շէնքերի կառուցման խոշոր ծաւալների
հաշուին: Տնտեսութեան զարգացումն ընդգրկել է այնպիսի
ծառայութիւններ, ինչպիսիք են առեւտուրը եւ հաղորդակցութիւնը:
2007թ.-ին գիւղատնտեսական արտադրանքի աճը կազմել է 9,6%, ընդ
որում, ցորենի բերքը կրկնապատկուել է` հասնելով 450 հազար տոննայի:
Նշուվել է նաեւ, որ 2008-2009թթ.-ին Հայաստանում սահմանուած
գերակայութիւններն են կառավարման բարելաւումը եւ աղքատութեան
կրճատումը, հարկերի հաւաքման աւելացումը` հարկերից ազատումը
վերացնելու միջոցով, փոքր եւ միջին բիզնեսի համար միջավայրի
բարելաւումը: Նախատեսւում է 2008թ.-ին ապահովել ՀՆԱ-ի 10% աճ եւ
առնուազն 8%` 2009թ.-ին:
Ըստ հետազօտութեան, 2007թ.-ին Հայաստանի պետական բիւջէն
հարկային գանձումների աւելացման հաշուին գրանցել է ՀՆԱ-ի 0,1%-ին
համարժէք յաւելուրդ: Սակայն, նկատի ունենալով սոցիալական ծրագրերի
եւ ենթակառուցուածքների զարգացման ծախսերը, սպասւում է, որ մինչեւ
2009թ.-ն բիւջէն նորից պակասուրդ կունենայ, որը կկազմի 2,6%:
Հարկային օրէնսդրութեան փոփոխութիւնների եւ հարկային ու մաքսային
վարչարարության բարելաւումների շնորհիւ պետեկամուտները
2008-2009թթ.-ին կարող են աւելացուել, սակայն հարկերի հաւաքումը
Հայաստանում դեռեւս լուրջ խնդիր է լինելու:
Բացի այդ, նշուվել է, որ ինչպէս Հիւսիսային եւ Կենտրոնական
Ասիայի երկրներում, այնպէս էլ Հայաստանում, 2007թ.-ին
դրամավարկային քաղաքականությունները հետապնդել են գների աճը
կասեցնելու եւ իրական փոխարժէքի մեծ աճը կանխելու նպատակ: Այդ
երկրների կառավարութիւնները խստացրել են դրամավարկային
քաղաքականութիւնը` աւելացնելով բանկերի եւ կառավարությունների
աւանդները, պարբերաբար բարձրացնելով ելակետային տոկոսադրույքներն
ու վերաֆինանսավորելով կենտրոնական բանկերը: Մասնաւորապէս,
Հայաստանի Կենտրոնական բանկը վերաֆինանսավորումն աւելացրել է
մինչեւ 5,75% եւ մեծացրել ներքին այնպիսի միջոցների օգտագործումը,
ինչպիսիք են վաճառքի եւ վերագնման (ռեպո) համաձայնագրերը:
Ըստ հետազօտութեան, Հայաստանում սննդամթերքի աճող գների,
աշխատավարձերի յետագայ բարձրացման եւ տնային տնտեսութիւնների
եկամուտների աւելացման արդիւնքում սպառողական գների աճը 2006թ.-ի
2,9%-ից 2007թ.-ին հասաւ շուրջ 4,4%-ի: Արագ ընթացող այս դրամական
էքսպանսիան եւ ներկրման բարձր գները Հայաստանում առաջացրին գների
զգալի աճ: 2007թ.-ի վերջին եռամսյակում հայկական դրամի արժէքը ԱՄՆ
դոլարի համեմատ աւելացաւ մօտաւորապէես 10%-ով: Դրամի արժեվորումը
մտահոգութիվւն է առաջացրել այն տնային տնտեսություններում, որոնց
ապրուստը կախուած է արտերկրից դրամական փոխանցումներից:
Նաեւ նշուվել է, որ թէեւ Հայաստանից ապրանքների արտահանման
ծաւալն աճել է 9,1%-ով, առեւտրի պակասուրդը 2007թ.-ի առաջին ինը
ամիսների ընթացքում զգալիօրէն աճել է` 2006թ.-ի 826 մլն ԱՄՆ
դոլարից հասնելով գրեթէ 1,4 մլրդ դոլարի: Հանքանիւթերի,
մեքենաների եւ շինարարական ծրագրերի համար սարքավորումների
ներկրման հաշուին 2007թ.-ի առաջին ինն ամիսների ընթացքում
ապրանքների ներկրման ծաւալն աճել է 1,9%-ով` հասնելով 2,2 մլրդ
դոլարի: Առեւտրի աւելացող պակասորդի հաշուին ընթացիկ հաշիւների
պակասուրդը 2006թ.-ի առաջին ինն ամիսների 78 մլն դոլարից (ՀՆԱ-ի
1,9%-ին համարժէք) 2007թ.-ի առաջին ինն ամիսների ընթացքում դարձել
է 327 մլն դոլար (ՀՆԱ-ի 5,7%-ին համարժէք):
ՄԱԿ-ի ԱԽՕՏՏՍ յանձնաժողովի փորձագետները նաեւ նշել են, որ
արտերկրից մասնաւոր դրամական փոխանցումները Հայաստանի տնտեսական
զարգացման համար դարձել են արտաքին ֆինանսաւորման կարեւոր աղբիւր:
2007թ.-ին դրանք զգալի ներդրում են եղել սոցիալ-տնտեսական
ոլորտում: Արտագնայ ժամանակաւոր եւ մշտական աշխատանքի համար
արտասահման մեկնածներից ստացուած փոխանցումները 2007թ.-ին հասել են
1,32 մլրդ դոլարի (երկրի ՀՆԱ-ի 14%-ին համարժէք): 2007թ.-ին
օտարերկրեայ ներդրումների հոսքերը շարունակել են հիմնական դեր
կատարել երկրի տնտեսութեան զարգացման եւ արդիականացման համար:
Հայաստանում օտարերկրեայ ներդրումների հոսքերը 2007թ.-ի առաջին ինն
ամիսների ընթացքում հասել են 351 մլն դոլարի, այնինչ 2006թ.-ի
նոյն ժամանակահատուածում դրանք կազմել են 202 մլն դոլար: Աճող
օտարերկրեայ ներդրումների մի զգալի մասն ուղղուել է
հեռահաղորդակցության եւ կոմունալ հատուածների, ինչպէս նաեւ երկրի
ընթացիկ հաշուի պակասորդի ֆինանսաւորմանը: