ՀԱՅԱՍՏԱՆՈՒՄ ՍՈՑԻԱԼԱԿԱՆ ԲԱՐԵՓՈԽՈՒՄՆԵՐԻ ԱՐԱԳՈՒԹՅՈՒՆԸ ԵՏ Է
ՄՆՈՒՄ ՄԱԿՐՈՏՆՏԵՍԱԿԱՆ ԲԱՐԵՓՈԽՈՒՄՆԵՐԻ ՏԵՄՊԵՐԻՑ
01-04-2008 20:26:00 | Հայաստան | Տնտեսություն
ԵՐԵՎԱՆ, 1 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի 2008-09թթ.-ի
սոցիալ-տնտեսական քաղաքականության կարեւոր մաս է կազմելու
սոցիալական բարեփոխումների իրականացումը: Առայժմ սոցիալական
բարեփոխումների արագությունը ետ է մնում մակրոտնտեսական
բարեփոխումների տեմպերից: Կառավարությունը բազմաթիվ միջոցառումներ
է ձեռնարկել, որպեսզի երկրի տնտեսական աճն ուղղվի բնակչության
կենսամակարդակը բարձրացնելուն, սակայն հասարակության մեջ
անհավասարության աճի, կրթության ու առողջապահական համակարգերի
վատթարացման միտումները շրջելու համար անհրաժեշտ են ռազմավարական
ներդրումներ: Այս եզրակացությունները ներկայացված են ՄԱԿ-ի Ասիայի
եւ Խաղաղօվկիանոսյան տարածաշրջանի տնտեսական ու սոցիալական
հանձնաժողովի (ԱԽՕՏՏՍՀ) «Ասիայի եւ Խաղաղօվկիանոսյան տարածաշրջանի
տնտեսական ու սոցիալական հետազոտություն 2008»-ում:
Հետազոտությունում հիշեցվում է, որ 2007թ.-ին ՀՀ
կառավարությունն ընդունել է աղքատության նվազեցման հնգամյա
քաղաքական ծրագիր, որով նախանշվում է դրա մակարդակը` այժմյան
30%-ից 2012թ.-ին հասցնել 12%-ի: Նշվել է, որ աղքատության շեմից
ցածր եկամուտներ ունեցող մարդկանց թիվը 1988թ.-ի 55%-ից 2005թ.-ին
նվազել է մինչեւ 34%: Եկամուտների անհավասարության չափման Ջինի
գործակիցը, որտեղ բարձր արժեքները ցույց են տալիս եկամուտների
առավել մեծ անհավասարություն, 1996թ.-ին Հայաստանում կազմել է
44,42, իսկ 2003թ.-ին` 33,8: Այդուհանդերձ, եկամուտների
անհավասարությունը շարունակում է մեծ խնդիր լինել երկրի համար:
Հետազոտության համաձայն, 2007թ.-ին Հայաստանը վեցերորդ տարին
անընդմեջ գրանցել է երկնիշ տնտեսական աճ եւ մնացել աշխարհի
ամենաարագ զարգացող երկրների շարքում: Երկրի ՀՆԱ-ն 2007թ.-ին աճել
է 13,8%-ով: Հայաստանում ՀՆԱ-ի աճի գլխավոր գործոններն են համարվել
շինարարությունը, գյուղատնտեսությունը եւ ծառայությունների ոլորտը:
Շինարարության աճն արագացել է արդյունաբերական արտադրության եւ
բնակելի ու գրասենյակային շենքերի կառուցման խոշոր ծավալների
հաշվին: Տնտեսության զարգացումն ընդգրկել է այնպիսի
ծառայություններ, ինչպիսիք են առեւտուրը եւ հաղորդակցությունը:
2007թ.-ին գյուղատնտեսական արտադրանքի աճը կազմել է 9,6%, ընդ
որում, ցորենի բերքը կրկնապատկվել է` հասնելով 450 հազար տոննայի:
Նշվել է նաեւ, որ 2008-2009թթ.-ին Հայաստանում սահմանված
գերակայություններն են կառավարման բարելավումը եւ աղքատության
կրճատումը, հարկերի հավաքման ավելացումը` հարկերից ազատումը
վերացնելու միջոցով, փոքր եւ միջին բիզնեսի համար միջավայրի
բարելավումը: Նախատեսվում է 2008թ.-ին ապահովել ՀՆԱ-ի 10% աճ եւ
առնվազն 8%` 2009թ.-ին:
Ըստ հետազոտության, 2007թ.-ին Հայաստանի պետական բյուջեն
հարկային գանձումների ավելացման հաշվին գրանցել է ՀՆԱ-ի 0,1%-ին
համարժեք հավելուրդ: Սակայն, նկատի ունենալով սոցիալական ծրագրերի
եւ ենթակառուցվածքների զարգացման ծախսերը, սպասվում է, որ մինչեւ
2009թ.-ն բյուջեն նորից պակասուրդ կունենա, որը կկազմի 2,6%:
Հարկային օրենսդրության փոփոխությունների եւ հարկային ու մաքսային
վարչարարության բարելավումների շնորհիվ պետեկամուտները
2008-2009թթ.-ին կարող են ավելացվել, սակայն հարկերի հավաքումը
Հայաստանում դեռեւս լուրջ խնդիր է լինելու:
Բացի այդ, նշվել է, որ ինչպես Հյուսիսային եւ Կենտրոնական
Ասիայի երկրներում, այնպես էլ Հայաստանում, 2007թ.-ին
դրամավարկային քաղաքականությունները հետապնդել են գների աճը
կասեցնելու եւ իրական փոխարժեքի մեծ աճը կանխելու նպատակ: Այդ
երկրների կառավարությունները խստացրել են դրամավարկային
քաղաքականությունը` ավելացնելով բանկերի եւ կառավարությունների
ավանդները, պարբերաբար բարձրացնելով ելակետային տոկոսադրույքներն
ու վերաֆինանսավորելով կենտրոնական բանկերը: Մասնավորապես,
Հայաստանի Կենտրոնական բանկը վերաֆինանսավորումն ավելացրել է
մինչեւ 5,75% եւ մեծացրել ներքին այնպիսի միջոցների օգտագործումը,
ինչպիսիք են վաճառքի եւ վերագնման (ռեպո) համաձայնագրերը:
Ըստ հետազոտության, Հայաստանում սննդամթերքի աճող գների,
աշխատավարձերի հետագա բարձրացման եւ տնային տնտեսությունների
եկամուտների ավելացման արդյունքում սպառողական գների աճը 2006թ.-ի
2,9%-ից 2007թ.-ին հասավ շուրջ 4,4%-ի: Արագ ընթացող այս դրամական
էքսպանսիան եւ ներկրման բարձր գները Հայաստանում առաջացրին գների
զգալի աճ: 2007թ.-ի վերջին եռամսյակում հայկական դրամի արժեքը ԱՄՆ
դոլարի համեմատ ավելացավ մոտավորապես 10%-ով: Դրամի արժեվորումը
մտահոգություն է առաջացրել այն տնային տնտեսություններում, որոնց
ապրուստը կախված է արտերկրից դրամական փոխանցումներից:
Նաեւ նշվել է, որ թեեւ Հայաստանից ապրանքների արտահանման
ծավալն աճել է 9,1%-ով, առեւտրի պակասուրդը 2007թ.-ի առաջին ինը
ամիսների ընթացքում զգալիորեն աճել է` 2006թ.-ի 826 մլն ԱՄՆ
դոլարից հասնելով գրեթե 1,4 մլրդ դոլարի: Հանքանյութերի,
մեքենաների եւ շինարարական ծրագրերի համար սարքավորումների
ներկրման հաշվին 2007թ.-ի առաջին ինն ամիսների ընթացքում
ապրանքների ներկրման ծավալն աճել է 1,9%-ով` հասնելով 2,2 մլրդ
դոլարի: Առեւտրի ավելացող պակասորդի հաշվին ընթացիկ հաշիվների
պակասուրդը 2006թ.-ի առաջին ինն ամիսների 78 մլն դոլարից (ՀՆԱ-ի
1,9%-ին համարժեք) 2007թ.-ի առաջին ինն ամիսների ընթացքում դարձել
է 327 մլն դոլար (ՀՆԱ-ի 5,7%-ին համարժեք):
ՄԱԿ-ի ԱԽՕՏՏՍ հանձնաժողովի փորձագետները նաեւ նշել են, որ
արտերկրից մասնավոր դրամական փոխանցումները Հայաստանի տնտեսական
զարգացման համար դարձել են արտաքին ֆինանսավորման կարեւոր աղբյուր:
2007թ.-ին դրանք զգալի ներդրում են եղել սոցիալ-տնտեսական
ոլորտում: Արտագնա ժամանակավոր եւ մշտական աշխատանքի համար
արտասահման մեկնածներից ստացված փոխանցումները 2007թ.-ին հասել են
1,32 մլրդ դոլարի (երկրի ՀՆԱ-ի 14%-ին համարժեք): 2007թ.-ին
օտարերկրյա ներդրումների հոսքերը շարունակել են հիմնական դեր
կատարել երկրի տնտեսության զարգացման եւ արդիականացման համար:
Հայաստանում օտարերկրյա ներդրումների հոսքերը 2007թ.-ի առաջին ինն
ամիսների ընթացքում հասել են 351 մլն դոլարի, այնինչ 2006թ.-ի
նույն ժամանակահատվածում դրանք կազմել են 202 մլն դոլար: Աճող
օտարերկրյա ներդրումների մի զգալի մասն ուղղվել է
հեռահաղորդակցության եւ կոմունալ հատվածների, ինչպես նաեւ երկրի
ընթացիկ հաշվի պակասորդի ֆինանսավորմանը: