ՀԱՎԱՆԱ, 19 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Ֆիդել Կաստրոն հրաժարուել
է պետութեան եւ կառավարութեան ղեկավարի` Կուբայի Պետական խորհրդի
նախագահի պաշտօնից: Այդ մասին նա յայտնել է հայրենակիցներին
ուղղուած դիմումում, որ հրապարակուել է «Գրանմա» թերթում:
«Եկել է Պետական խորհրդի նոր ղեկավարութիւն ընտրելու պահը:
Ես այդ պատուաւոր պարտականութիւնը կատարում էի բազում տարիներ
շարունակ»,- յայտարարել է Կաստրոն ուղերձում:
Երկրի Պետխորհրդի` գործադիր իշխանութեան բարձրագոյն մարմնի
նոր կազմը կձեւաւորուի փետրուարի 24-ին Կուբայի նոր գումարման
Ժողովրդական իշխանութեան ազգային վեհաժողովի (խորհրդարանի) առաջին
նիստում:
Կուբայի յեղափոխութեան առաջնորդը այդ պաշտօնն անփոփոխ
զբաղեցնում էր 1976 թուականին այն հիմնելու պահից ի վեր: 2006
թուականի յուլիսի 31-ին Ֆիդել Կաստրոն ծանր հիւանդութեան պատճառով
իշխանութիւնը փոխանցեց Պետխորհրդի նախագահի առաջին տեղակալ Ռաուլ
Կաստրոյին, որը միեւնոյն ժամանակ յեղափոխական զինուած ուժերի
նախարարն է: