ԵՐԳԻՉ ՀԱՄԼԵՏ ԳԵՎՈՐԳՅԱՆԸ ԱՐԺԱՆԱՑԵԼ Է ԱՌԱՋԻՆ ՄՐՑԱՆԱԿԻ
«SONICBIDS» ԸՆԿԵՐՈՒԹԵԱՆ ԻՆՏԵՐՆԵՏԱՅԻՆ ՄՐՑՈՅԹՈՒՄ
16-11-2007 14:40:00 | Հայաստան | Մշակոյթ
ԵՐԵՎԱՆ, 16 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Ամերիկեան «Sonicbids»
ընկերութեան անցկացրած ինտերնետային մրցոյթում առաջին մրցանակի է
արժանացել հայկական ժողովրդական երգերի կատարող Համլետ Գեւորգեանը:
Երգիչը մրցոյթին մասնակցել է Միջազգային երաժշտական ինֆորմացիոն
կենտրոնի անդամ «Armenian music center»-ի (AMC) նախաձեռնութեամբ:
Ինչպէս նոյեմբերի 16-ի ասուլիսում յայտնեց AMC-ի մենեջեր
Լիլիթ Արշակեանը, մրցոյթին մասնակցել են տարբեր երկրների բազմաթիւ
երգիչներ, եւ ընդհանուր առմամբ ներկայացուել են 1 միլիոնից աւելի
ստեղծագործութիւն: Հ.Գեւորգեանը ներկայացրել է հայկական
ժողովրդական երգեր, ինչպէս նաեւ յատուկ իր համար գրուած
ստեղծագործութիւններ:
«Մենք փորձեցինք միջազգային ճանաչում ունեցող նախագծում
ներկայացնել հայկական ժողովրդական երգերը, որպէսզի մեզ առաջին
հերթին ճանաչեն մեր ազգայինով երգարվեստով»,- նշեց Լ.Արշակեանը:
Նրա խօսքերով, այս մրցոյթից յետոյ Հ.Գեւորգեանը հնարաւորութիւն
կունենայ համագործակցել աշխարհահռչակ պրոդյուսերական կենտրոնների
հետ եւ դուրս գալ միջազգային ասպարէզ: Նշուեց նաեւ, որ մրցոյթից
յետոյ երգիչն արդէն տարբեր միջազգային փառատօնների եւ համերգների
մասնակցութեան հրավէր է ստացել:
Լ.Արշակեանը տեղեկացրեց նաեւ, որ մրցանակաբաշխությունը
կկայանայ 2008թ.-ի յունուարին` Փարիզում: