ՃԱՊՈՆԻԱՅԻ ՆՈՐ ՎԱՐՉԱՊԵՏ Է ԸՆՏՐՈՒԵԼ ՅԱՍՈՒՈ ՖՈՒԿՈՒԴԱՆ
25-09-2007 16:02:00 | | Միջազգային
ՏՈԿԻՈ, 25 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Ճապոնիայի կառավարող
Լիբերալ-դեմոկրատական կուսակցութեան նախագահ Յասուո Ֆուկուդան
սեպտեմբերի 25-ին ընտրուել է երկրի վարչապետի պաշտօնում: Նրա օգտին
են քուէարկել խորհրդարանի ստորին պալատի պատգամաւորների մեծ մասը,
որտեղ գերակշռում են լիբերալ-դեմոկրատները եւ նրանց դաշնակից
պատգամաւորները «Կոմեյտո» ցենտրիստական կուսակցութիւնից:
Վարչապետի ընտրութեան ժամանակ խորհրդարանի ստորին պալատը
առաւելութիւն ունի վերին պալատի նկատմամբ:
Սպասւում է, որ օրուայ ընթացքում վարչապետը կյայտարարի իր
կառավարութեան կազմի մասին:
Յիշեցնենք, որ Ճապոնիայի նախկին վարչապետ 53-ամեայ Սինձո Աբեն
հրաժարական էր տուել սեպտեմբերի 12-ին, որից յետոյ հյուծվածության
ախտանիշներով տեղափոխուել էր հիւանդանոց: Աբեն ճապոնական
կառավարութիւնը գլխաւորում էր 2006 թուականի սեպտեմբերի 26-ից: