«ՈՍԿԷ ԾԻՐԱՆ» ԿԻՆՈՓԱՌԱՏՕՆԻ ՄԻՋԱԶԳԱՅԻՆ ՄՐՑՈՒԹԱՅԻՆ ԾՐԱԳՐԵՐՈՒՄ
ԸՆԴԳՐԿՈՒԵԼ ԵՆ ՎԵՐՋԻՆ ԵՐԿՈՒ ՏԱՐԻՆԵՐԻՆ ՍՏԵՂԾՈՒԱԾ ՖԻԼՄԵՐԻ ԼԱՒԱԳՈՅՆ
ՆՄՈՒՇՆԵՐԸ
27-06-2007 20:27:00 | Հայաստան | Մշակոյթ
ԵՐԵՎԱՆ, 27 ՅՈՒՆԻՍԻ, ՆՈՅԵԱՆ ՏԱՊԱՆ: Յուլիսի 9-14-ը կայանալիք
«Ոսկէ ծիրան» միջազգային 4-րդ կինոփառատօնը կմեկնարկի իտալացի
անուանի ռեժիսորներ Վիտորիո եւ Պաոլո Տավիանի եղբայրների
«Արտույտների ագարկը» ֆիլմի ցուցադրությամբ: Այն կեզրափակուի Անդրեյ
Զվյագինցեւի «Արտաքսում» կինոնկարի ցուցադրությամբ, որը Կանի
փառատոնում արժանացել է մրցանակի` տղամարդու լաւագոյն
դերակատարման համար: Այս ֆիլմը նկարահանուել է Վիլեամ Սարոեանի
գործերի հիման վրայ:
Ինչպէս յունիսի 27-ի մամլոյ ասուլիսում նշեց փառատոնի ծրագրերի
տնօրէն, կինոգետ Միքայէլ Ստամբոլցեանը, փառատոնի միջազգային
մրցութային երկու` խաղարկային եւ վաւերագրական ծրագրերում
ընդգրկուած են վերջին 1-2 տարիներին ստեղծուած լաւագոյն եւ
մրցանակակիր ֆիլմերը: Այդ ֆիլմերը մշակոյթային արժէք ներկայացնող
գործեր են, որոնք Հայաստան են բերւում միայն մէկ նպատակով`
ցուցադրելու եւ ծանօթացնելու կինոհանդիսատեսին ու կինոարուեստի
սիրահարներին կինոլեզվի ու կինոմտածողութեան լաւագոյն նմուշների
հետ:
Խաղարկային բաժնում այս տարի կներկայացուի 10 ֆիլմ, որոնց
գերակշիռ մասը Կանի կինոփառատօնում արժանացել է տարբեր
մրցանակների: Իսկ վաւերագրական ֆիլմերի մրցութային ծրագրում
կներկայացուի 14 կինոնկար: Մ.Ստամբոլցեանը նշեց նաեւ, որ այս տարի
միջազգային մրցութային ծրագրերի ժիւրիի կազմում կընդգրկուեն հայ
կինոգործիչներ:
Մ.Ստամբոլցեանի խօսքերով, այս տարի փառատոնը կունենայ եւս մէկ
նոր ծրագիր` «Նոր հայկական կինո», ուր ընդգրկուած են դեռեւս
չաւարտուած հայկական խաղարկային ֆիլմերը: Այս տարուայ նորություններից
է նաեւ փառատոնի շրջանակներում ֆրանսիական 10 ֆիլմերի
ցուցադրությունը:
«Ոսկէ ծիրան»-ի հիմնադիր տնօրէն, կինոռեժիսոր Յարութիւն
Խաչատրեանի խօսքերով, կինոփառատօնի օրերին կանցկացուեն վարպետութեան
դասեր` ճանաչուած կինոգործիչների կողմից, կկազմակերպուեն բազմաթիւ
արտամրցութային ցուցադրություններ, հանդիպումներ կինոարտադրությանը
աջակցող հիմնադրամների նախագահների եւ պրոդյուսերների հետ: