«ՈՍԿԵ ԾԻՐԱՆ» ԿԻՆՈՓԱՌԱՏՈՆԻ ՄԻՋԱԶԳԱՅԻՆ ՄՐՑՈՒԹԱՅԻՆ ԾՐԱԳՐԵՐՈՒՄ
ԸՆԴԳՐԿՎԵԼ ԵՆ ՎԵՐՋԻՆ ԵՐԿՈՒ ՏԱՐԻՆԵՐԻՆ ՍՏԵՂԾՎԱԾ ՖԻԼՄԵՐԻ ԼԱՎԱԳՈՒՅՆ
ՆՄՈՒՇՆԵՐԸ
27-06-2007 20:27:00 | Հայաստան | Մշակույթ
ԵՐԵՎԱՆ, 27 ՀՈՒՆԻՍԻ, ՆՈՅՅԱՆ ՏԱՊԱՆ: Հուլիսի 9-14-ը կայանալիք
«Ոսկե ծիրան» միջազգային 4-րդ կինոփառատոնը կմեկնարկի իտալացի
անվանի ռեժիսորներ Վիտորիո եւ Պաոլո Տավիանի եղբայրների
«Արտույտների ագարկը» ֆիլմի ցուցադրությամբ: Այն կեզրափակվի Անդրեյ
Զվյագինցեւի «Արտաքսում» կինոնկարի ցուցադրությամբ, որը Կանի
փառատոնում արժանացել է մրցանակի` տղամարդու լավագույն
դերակատարման համար: Այս ֆիլմը նկարահանվել է Վիլյամ Սարոյանի
գործերի հիման վրա:
Ինչպես հունիսի 27-ի մամլո ասուլիսում նշեց փառատոնի ծրագրերի
տնօրեն, կինոգետ Միքայել Ստամբոլցյանը, փառատոնի միջազգային
մրցութային երկու` խաղարկային եւ վավերագրական ծրագրերում
ընդգրկված են վերջին 1-2 տարիներին ստեղծված լավագույն եւ
մրցանակակիր ֆիլմերը: Այդ ֆիլմերը մշակութային արժեք ներկայացնող
գործեր են, որոնք Հայաստան են բերվում միայն մեկ նպատակով`
ցուցադրելու եւ ծանոթացնելու կինոհանդիսատեսին ու կինոարվեստի
սիրահարներին կինոլեզվի ու կինոմտածողության լավագույն նմուշների
հետ:
Խաղարկային բաժնում այս տարի կներկայացվի 10 ֆիլմ, որոնց
գերակշիռ մասը Կանի կինոփառատոնում արժանացել է տարբեր
մրցանակների: Իսկ վավերագրական ֆիլմերի մրցութային ծրագրում
կներկայացվի 14 կինոնկար: Մ.Ստամբոլցյանը նշեց նաեւ, որ այս տարի
միջազգային մրցութային ծրագրերի ժյուրիի կազմում կընդգրկվեն հայ
կինոգործիչներ:
Մ.Ստամբոլցյանի խոսքերով, այս տարի փառատոնը կունենա եւս մեկ
նոր ծրագիր` «Նոր հայկական կինո», ուր ընդգրկված են դեռեւս
չավարտված հայկական խաղարկային ֆիլմերը: Այս տարվա նորություններից
է նաեւ փառատոնի շրջանակներում ֆրանսիական 10 ֆիլմերի
ցուցադրությունը:
«Ոսկե ծիրան»-ի հիմնադիր տնօրեն, կինոռեժիսոր Հարություն
Խաչատրյանի խոսքերով, կինոփառատոնի օրերին կանցկացվեն վարպետության
դասեր` ճանաչված կինոգործիչների կողմից, կկազմակերպվեն բազմաթիվ
արտամրցութային ցուցադրություններ, հանդիպումներ կինոարտադրությանը
աջակցող հիմնադրամների նախագահների եւ պրոդյուսերների հետ: