ԵՐԵՎԱՆ, 29 ՄԱՐՏԻ, ՆՈՅԵԱՆ ՏԱՊԱՆ: 2006թ.-ի յունվարի 1-ի
դրութեամբ Հայաստանում ապրում էր 1 մլն 665 հազար 123 կին, ինչը
կազմում է հանրապետութեան բնակչութեան ընդհանուր թուի 51,7%-ը:
Նոյն օրուայ դրութեամբ կանանց ամենաբարձր տեսակարար կշիռն
արձանագրուել է Երեւանում` 53,3%, իսկ ամենացածրը Գեղարքունիքում`
49,7% տոկոս: Այս մասին «ՆՈՅԵԱՆ ՏԱՊԱՆ»-ի թղթակցին յայտնեց ՀՀ
Ազգային վիճակագրական ծառայութեան Մարդահամարի եւ ժողովրդագրութեան
բաժնի պետ Կարինէ Կույումջյանը:
Ըստ նրա, հանրապետութիւնում 2006թ.-ին նորածինների 46,4%-ը
կազմել են աղջիկները: Կ.Կույումջյանը նշեց, որ թէեւ սովորաբար
տղաներ աւելի շատ են ծնւում, սակայն նրանց շրջանում արձանագրւում է
մահացութեան աւելի բարձր ցուցանիշ:
Կ.Կույումջյանը նշեց նաեւ, որ կանանց կեանքի միջին
տեւողությունը 2005թ.-ի տուեալներով կազմել է 76,5 տարեկան:
Հանրապետութիւնում արձանագրուած մահերի 47,9%-ը բաժին է ընկնում
կանանց: Դրանք հիմնականում պայմանաւորուած են արիւնատար համակարգի
հիւանդութիւններով, նորագոյացություններով, էնդոկրին համակարգի,
շնչառական օրգանների հիւանդութիւններով: