Տիգրան Սարգսեան. «Մենք պարտաւոր ենք լուծել մեր բանակի
սպայական անձնակազմի սոցիալական խնդիրները»
17-12-2009 20:52:00 | Հայաստան | Հասարակութիւն
ԱՐՄԱՒԻՐ, 17 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Դեկտեմբերի 17-ին
Արմաւիրի մարզ կատարած աշխատանքային այցի շրջանակներում ՀՀ
վարչապետ Տիգրան Սարգսեանը մասնակցել է Արմաւիր քաղաքում
Պաշտպանութեան նախարարութեան զինծառայողների համար ծառայողական
բնակելի շէնքի շահագործման յանձնման հանդիսաւոր արարողութեանը: Ըստ
ՀՀ կառավարութեան Տեղեկատուութեան եւ հասարակայնութեան հետ կապերի
վարչութեան հաղորդագրութեան, անցեալ տարուանից իրականացուած
աշխատանքների համար պետական բիւջէից ծախսուել է շուրջ 250 մլն
դրամ: Արմաւիրի թեմի առաջնորդ Տ. Սիոն եպս. Ադամեանի օրհնութեամբ
բացուած շէնքն ունի 16 բնակարան:
Բնակարանաշինութիւնը համարելով փոքրիկ յաղթանակ ճգնաժամի
պայմաններում, Տ.Սարգսեանը ասել է. «Մենք պարտաւոր ենք լուծել մեր
բանակի սպայական անձնակազմի սոցիալական խնդիրները: Սա
կառավարութեան կարեւորագոյն պարտավորություններից մէկն է, որպէսզի
Դուք միշտ զգաք, որ ամուր թիկունք ունեք: Դեռ շատ անելիքներ կան,
եւ հազարաւոր ընտանիքներ բնակարանի կարիք ունեն: Դա կառավարութեան
համար գերակայութիւն է, եւ առաջին հերթին մեր թիրախային խումբը
պէտք է լինեն երիտասարդ նորակազմ ընտանիքները»: