ԱՐՄԱՎԻՐ, 17 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 17-ին Արմավիրի մարզ կատարած աշխատանքային այցի շրջանակներում ՀՀ վարչապետ Տիգրան Սարգսյանը մասնակցել է Արմավիր քաղաքում Պաշտպանության նախարարության զինծառայողների համար ծառայողական բնակելի շենքի շահագործման հանձնման հանդիսավոր արարողությանը: Ըստ ՀՀ կառավարության Տեղեկատվության եւ հասարակայնության հետ կապերի վարչության հաղորդագրության, անցյալ տարվանից իրականացված աշխատանքների համար պետական բյուջեից ծախսվել է շուրջ 250 մլն դրամ: Արմավիրի թեմի առաջնորդ Տ. Սիոն եպս. Ադամյանի օրհնությամբ բացված շենքն ունի 16 բնակարան: Բնակարանաշինությունը համարելով փոքրիկ հաղթանակ ճգնաժամի պայմաններում, Տ.Սարգսյանը ասել է. «Մենք պարտավոր ենք լուծել մեր բանակի սպայական անձնակազմի սոցիալական խնդիրները: Սա կառավարության կարեւորագույն պարտավորություններից մեկն է, որպեսզի Դուք միշտ զգաք, որ ամուր թիկունք ունեք: Դեռ շատ անելիքներ կան, եւ հազարավոր ընտանիքներ բնակարանի կարիք ունեն: Դա կառավարության համար գերակայություն է, եւ առաջին հերթին մեր թիրախային խումբը պետք է լինեն երիտասարդ նորակազմ ընտանիքները»:

---