ՀՀ սփիւռքի նախարարն ընդունեց ուռոլոգների հայկական
ընկերակցութեան պատուիրակութեանը
23-09-2009 20:00:00 | Հայաստան | Հասարակութիւն
ԵՐԵՎԱՆ, 23 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Սեպտեմբերի 23-ին ՀՀ սփիւռքի նախարար Հրանուշ Հակոբեանն ընդունեց
ուռոլոգների հայկական ընկերակցութեան պատուիրակութեանը
ընկերակցութեան հիմնադիր-անդամ, վիրաբոյժների եւ ուռոլոգների
ամերիկեան ընկերակցությունների անդամ, ամերիկահայ դոկտոր, պրոֆեսոր
Կարօ Դերձակյանի եւ ընկերակցութեան նախագահ Յովհաննէս Աղաջանեանի
գլխաւորութեամբ:
Սփիւռքահայ եւ հայաստանցի բժիշկները
տեղեկացրեցին, որ սեպտեմբերի 25-26-ին Դիլիջանում կանցկացուի
ուռոլոգների հայկական ընկերակցութեան 11-րդ համաժողովը, որին
կմասնակցեն հայաստանցի մօտ 120 եւ սփիւռքահայ շուրջ 80 բժիշկներ
ԱՄՆ-ից, Ֆրանսիայից, Մեծ Բրիտանիայից, Ռուսաստանից եւ Վրաստանից:
Ինչպէս տեղեկացրեցին ՀՀ սփիւռքի նախարարութիւնից, տիկին
Յակոբեանը համաժողովի անցկացումը կարեւորեց ՀՀ սփիւռքի
նախարարութեան ծրագրային խնդիրների, այն է` Սփիւռքի մասնագիտական
ներուժի բացայայտման, մասնագէտների տուեալների շտեմարանների,
համահայկական մասնագիտական ցանցերի ստեղծման տեսանկիւնից:
Զրոյցի ընթացքում կարեւորուեց նաեւ Հայաստանում բժշկական
համալսարանական կրթութեան զարգացման, առողջապահական չափորոշիչների
սահմանման եւ կիրառման, բժիշկների եւ առողջապահական հիմնարկների
որակաւորման հարցերում արտերկրի առաջատար փորձի փոխառնման
անհրաժեշտութիւնը:
Հիւրերն ընդգծեցին ազգային նշանակութեան խնդիրների շուրջ
Հայաստան-Սփիռք երկխօսութեան աշխուժացման, ինչպէս նաեւ
հակերների կողմից համացանցային հայկական կայքերի
հասցէների վերաուղղորդման դէմ քայլեր ձեռնարկելու
անհրաժեշտութիւնը: ՀՀ սփիւռքի նախարարը համոզմունք յայտնեց, որ
տեղեկատուական անվտանգութեան այդ խնդիրը եւս անհրաժեշտ է կարգաւորել
հայաստանցի եւ սփիւռքահայ բարձրակարգ մասնագէտների ներգրաւման
միջոցով: