Հայաստանի պետբիւջէ մուտքագրուած ԱԱՀ-ի ծաւալը նուազել է
21,7%-ով, իսկ շահութահարկինը` 20,9%-ով
06-04-2009 20:05:00 | Հայաստան | Տնտեսութիւն
ԵՐԵՎԱՆ, 6 ԱՊՐԻԼԻ, ՆՈՅԵԱՆ ՏԱՊԱՆ: 2009թ.-ի յունուար-փետրուարին
պետական ՀՀ պետբիւջէ մուտքագրուած հարկերն ու տուրքերը կազմել են
շուրջ 67,6 մլրդ դրամ (մօտ 201,5 մլն ԱՄՆ դոլար), ինչով ապահովել
է եռամսյակային ծրագրի 45,1%-ով կատարումը:
Ըստ ՀՀ Ֆինանսների նախարարութեան Տեղեկատուութեան եւ
հասարակայնութեան հետ կապերի բաժնի, հարկերի ու տուրքերի 48,6%-ն
ապահովել է աւելացուած արժէքի հարկի հաշուին: Դրա ծաւալը կազմել է
շուրջ 32,9 մլրդ դրամ եւ նախորդ տարուայ յունուար-փետրուարի համեմատ
նուազել 21,7%-ով կամ 9,1 մլրդ դրամով: ԱԱՀ-ի մուտքերից աւելի քան
21,7 մլրդ դրամը ստացուել է ՀՀ սահմանին հարկումից, 11,2 մլրդ
դրամը` ապրանքների եւ ծառայութիւնների ներքին շրջանառութիւնից:
Ընդ որում, նուազել են ե'ւ ներմուծումից, ե'ւ ներքին
շրջանառութիւնից ստացուած գումարները:
Պետական բիւջէի հարկերի ու տուրքերի 9,1%-ն ապահովել է
ակցիզային հարկի հաշուին, որը կազմել է շուրջ 6,2 մլրդ դրամ.
մասնաւորապէս, հանրապետութիւն ներմուծուած ենթաակցիզային
ապրանքների հարկումից ստացուել է աւելի քան 4,2 մլրդ դրամ, որից
շուրջ 1,5 մլրդ դրամը` բենզինի եւ դիզելային վառելիքի, 2,2 մլրդ
դրամը` ծխախոտի ներմուծման հարկումից: Հանրապետութիւնում
արտադրուող ենթաակցիզային ապրանքների հարկումից պետական բիւջէի
մուտքերը կազմել են 1,9 մլրդ դրամ, որից 1,3 մլրդ դրամը ստացուել է
ներքին արտադրութեան ծխախոտի իրացումից: Նախորդ տարուայ
յունուար-փետրուարի համեմատ ակցիզային հարկի ծաւալը նուազել է 5,3%-ով
կամ 346,1 մլն դրամով: Ընդ որում, նուազել են ե'ւ հանրապետութիւն
ներմուծուած ենթաակցիզային ապրանքների հարկումից, ե'ւ
հանրապետութիւնում արտադրուող ենթաակցիզային ապրանքների հարկումից
ստացուած գումարները:
2008թ.-ի յունուար-փետրուարին պետբիւջէի հարկերի ու տուրքերի
13,2%-ն ապահովել է շահութահարկի հաշուին, որը կազմել է շուրջ 8,9
մլրդ դրամ: Նախորդ տարուայ համեմատ շահութահարկի գծով մուտքերը
նուազել են 20,9%-ով կամ 2,4 մլրդ դրամով:
2009թ.-ի յունուար-փետրուարին ՀՀ պետբիւջէ մուտքագրուած
եկամտահարկի ծաւալը կազմել է շուրջ 7,6 մլրդ դրամ, որի գծով
ապահովել է հարկերի ու տուրքերի 11,2%-ը: Նախորդ տարուայ նոյն
ժամանակահատուածի համեմատ եկամտահարկի գծով մուտքերն աճել են
15,8%-ով կամ 1 մլրդ դրամով: