Հայաստանի պետբյուջե մուտքագրված ԱԱՀ-ի ծավալը նվազել է
21,7%-ով, իսկ շահութահարկինը` 20,9%-ով
06-04-2009 20:05:00 | Հայաստան | Տնտեսություն
ԵՐԵՎԱՆ, 6 ԱՊՐԻԼԻ, ՆՈՅՅԱՆ ՏԱՊԱՆ: 2009թ.-ի հունվար-փետրվարին
պետական ՀՀ պետբյուջե մուտքագրված հարկերն ու տուրքերը կազմել են
շուրջ 67,6 մլրդ դրամ (մոտ 201,5 մլն ԱՄՆ դոլար), ինչով ապահովվել
է եռամսյակային ծրագրի 45,1%-ով կատարումը:
Ըստ ՀՀ Ֆինանսների նախարարության Տեղեկատվության եւ
հասարակայնության հետ կապերի բաժնի, հարկերի ու տուրքերի 48,6%-ն
ապահովվել է ավելացված արժեքի հարկի հաշվին: Դրա ծավալը կազմել է
շուրջ 32,9 մլրդ դրամ եւ նախորդ տարվա հունվար-փետրվարի համեմատ
նվազել 21,7%-ով կամ 9,1 մլրդ դրամով: ԱԱՀ-ի մուտքերից ավելի քան
21,7 մլրդ դրամը ստացվել է ՀՀ սահմանին հարկումից, 11,2 մլրդ
դրամը` ապրանքների եւ ծառայությունների ներքին շրջանառությունից:
Ընդ որում, նվազել են ե'ւ ներմուծումից, ե'ւ ներքին
շրջանառությունից ստացված գումարները:
Պետական բյուջեի հարկերի ու տուրքերի 9,1%-ն ապահովվել է
ակցիզային հարկի հաշվին, որը կազմել է շուրջ 6,2 մլրդ դրամ.
մասնավորապես, հանրապետություն ներմուծված ենթաակցիզային
ապրանքների հարկումից ստացվել է ավելի քան 4,2 մլրդ դրամ, որից
շուրջ 1,5 մլրդ դրամը` բենզինի եւ դիզելային վառելիքի, 2,2 մլրդ
դրամը` ծխախոտի ներմուծման հարկումից: Հանրապետությունում
արտադրվող ենթաակցիզային ապրանքների հարկումից պետական բյուջեի
մուտքերը կազմել են 1,9 մլրդ դրամ, որից 1,3 մլրդ դրամը ստացվել է
ներքին արտադրության ծխախոտի իրացումից: Նախորդ տարվա
հունվար-փետրվարի համեմատ ակցիզային հարկի ծավալը նվազել է 5,3%-ով
կամ 346,1 մլն դրամով: Ընդ որում, նվազել են ե'ւ հանրապետություն
ներմուծված ենթաակցիզային ապրանքների հարկումից, ե'ւ
հանրապետությունում արտադրվող ենթաակցիզային ապրանքների հարկումից
ստացված գումարները:
2008թ.-ի հունվար-փետրվարին պետբյուջեի հարկերի ու տուրքերի
13,2%-ն ապահովվել է շահութահարկի հաշվին, որը կազմել է շուրջ 8,9
մլրդ դրամ: Նախորդ տարվա համեմատ շահութահարկի գծով մուտքերը
նվազել են 20,9%-ով կամ 2,4 մլրդ դրամով:
2009թ.-ի հունվար-փետրվարին ՀՀ պետբյուջե մուտքագրված
եկամտահարկի ծավալը կազմել է շուրջ 7,6 մլրդ դրամ, որի գծով
ապահովվել է հարկերի ու տուրքերի 11,2%-ը: Նախորդ տարվա նույն
ժամանակահատվածի համեմատ եկամտահարկի գծով մուտքերն աճել են
15,8%-ով կամ 1 մլրդ դրամով: