2008 Թ.-Ի ՅՈՒՆՈՒԱՐ-ՀՈԿՏԵՄԲԵՐԻՆ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՇԱՀՈՒԹԱՀԱՐԿԻ ԾԱՒԱԼՆ ԱՃԵԼ Է 18,4%-ՈՎ,
ԵԿԱՄՏԱՀԱՐԿԻՆԸ` 18,6%-ՈՎ, ԻՍԿ ՄԱՔՍԱՏՈՒՐՔԻՆԸ` 72,5%-ՈՎ
27-11-2008 18:36:00 | Հայաստան | Տնտեսութիւն
ԵՐԵՎԱՆ, 27 ՆՈՅԵՄԲԵՐԻ, ՆՈՅԵԱՆ ՏԱՊԱՆ: 2008թ.-ի պետբիւջէի
հարկային եկամուտների 14,3%-ն ապահովել է շահութահարկի հաշուին,
որը կազմել է աւելի քան 71,1 մլրդ դրամ (աւելի քան 232,4 մլն ԱՄՆ
դոլար): Նախորդ տարուայ համեմատ շահութահարկի մուտքերն աճել են
18,4%-ով կամ շուրջ 11,1 մլրդ դրամով, ինչը հիմնականում
պայմանաւորուած է ոչ պետական կազմակերպութիւնների, նուազագոյն
շահութահարկի վճարման պահանջից ելնելով` մէկ տոկոս դրոյքաչափով
վճարումների եւ ֆինանսավարկային կազմակերպութիւնների վճարած
շահութահարկի աճով:
Ըստ ՀՀ Ֆինանսների նախարարութեան լրատուական ծառայութեան,
2008թ.-ի յունուար-հոկտեմբերին ՀՀ պետբիւջէ մուտքագրուած
եկամտահարկը կազմել է աւելի քան 42,8 մլրդ դրամ, ինչը կազմել է
հարկային եկամուտների 8,6%-ը: Այն 18,6%-ով կամ աւելի քան 6,7 մլրդ
դրամով գերազանցել է նախորդ տարուայ նոյն ժամանակահատուածի
ցուցանիշը: Աճի հիմնական աղբիւր են հանդիսացել աշխատավարձի եւ
դրան հաւասարեցուած այլ վճարումների գծով եկամտահարկի գանձումները,
որոնք 6,3 մլրդ դրամով գերազանցել են նախորդ տարուայ համապատասխան
ցուցանիշը:
Նշուած ժամանակահատուածում հարկային եկամուտներից առաւելագոյն
աճ է արձանագրուել մաքսատուրքի գծով, որը կազմել է շուրջ 30,6 մլրդ
դրամ` 72,5%-ով կամ 12,8 մլրդ դրամով գերազանցելով 2007թ.-ի նոյն
ժամանակահատուածի ցուցանիշը եւ ապահովելով պետական բիւջէի հարկային
եկամուտների 6,2%-ը:
2008թ.-ի տասն ամիսներին գործունէութեան առանձին տեսակներից
գանձուած հաստատագրուած վճարները կազմել են շուրջ 16,4 մլրդ դրամ`
11,8%-ով կամ 1,7 մլրդ դրամով գերազանցելով 2007թ.-ի նոյն
ժամանակահատուածի համապատասխան ցուցանիշը: Գերազանցումը հիմնականում
պայմանաւորուած է տրանսպորտային միջոցների գազալցման, առեւտրի
իրականացման վայր կազմակերպելու եւ առեւտրային գործունէութեան,
խաղատների գործունէութեան, հանրային սննդի ոլորտում գործունէութեան
կազմակերպման, ինչպէս նաեւ դրամական շահումով խաղային աւտոմատների
շահագործման գծով ստացուած մուտքերի աճով:
Նշուած ժամանակահատուածում ՀՀ պետբիւջէ է մուտքագրուել 5,5 մլրդ
դրամ պարզեցուած հարկ: Նախորդ տարուայ նոյն ժամանակահատուածի համեմատ
այն նուազել է 31,9%-ով կամ 2,6 մլրդ դրամով` պայմանաւորուած
«Պարզեցուած հարկի մասին» ՀՀ օրէնքում կատարուված փոփոխություններով,
որոնցով 2008թ.-ի յունվարի 1-ից կրճատուել են պարզեցուած հարկի
գործունէութեան տեսակները, ինչպէս նաեւ նախատեսուել են
սահմանափակումներ առեւտրային գործունէութիւն իրականացնող
կազմակերպութիւնների եւ անհատ ձեռնարկատէրերի համար: