2008 Թ.-Ի ՅՈՒՆՈՒԱՐ-ՀՈԿՏԵՄԲԵՐԻՆ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՀՀ ՊԵՏԲԻՒՋԷԻ ԵԿԱՄՈՒՏՆԵՐՆ ԱՃԵԼ ԵՆ
22,4%-ՈՎ, ԻՍԿ ԾԱԽՍԵՐԸ` 25,4%-ՈՎ
27-11-2008 04:02:00 | Հայաստան | Տնտեսութիւն
ԵՐԵՎԱՆ, 27 ՆՈՅԵՄԲԵՐԻ, ՆՈՅԵԱՆ ՏԱՊԱՆ: 2008թ.-ի թուականի
յունուար-հոկտեմբերին ՀՀ պետբիւջէի եկամուտները կազմել են աւելի
քան 625 մլրդ դրամ (աւելի քան 2 մլրդ 43,4 մլն ԱՄՆ դոլար), իսկ
ծախսերը` 614,2 մլրդ դրամ, որոնց գծով տարեկան ծրագրային
ցուցանիշների կատարումը ապահովել է, համապատասխանաբար, 81,3%-ով
եւ 77,2%-ով:
Ըստ ՀՀ Ֆինանսների նախարարութեան լրատուական ծառայութեան,
նախորդ տարուայ նոյն ժամանակահատուածի համեմատ պետական բիւջէի
եկամուտներն աւելացել են 22,4%-ով կամ շուրջ 114,5 մլրդ դրամով,
իսկ ծախսերը` 25,4%-ով կամ 124.5 մլրդ դրամով: Ընդ որում, 25,2%-ով
կամ 103,7 մլրդ դրամով աւելացել են հարկերը եւ տուրքերը, 18,3%-ով
կամ 13 մլրդ դրամով` պարտադիր սոցիալական ապահովութեան վճարները,
168,2%-ով կամ 2,2 մլրդ դրամով` պաշտօնական դրամաշնորհները, իսկ
այլ եկամուտները (նախկինում` ոչ հարկային եկամուտներ) նուազել են
16,1%-ով կամ 4,4 մլրդ դրամով: Արդիւնքում եկամուտների կազմում
1,8 տոկոսային կէտով աճել է հարկերի եւ տուրքերի, 0,3 տոկոսային
կէտով` պաշտօնական դրամաշնորհների տեսակարար կշիռը, իսկ պարտադիր
սոցիալական ապահովութեան վճարների եւ այլ եկամուտների տեսակարար
կշիռները նուազել են, համապատասխանաբար, 0,5 եւ 1,7 տոկոսային
կէտով:
Պետական բիւջէի եկամուտների զգալի մասը` 79,3%-ը, ձեւաւորուել
է հարկային մուտքերի հաշուին, 3%-ը` պետական տուրքի, 13,4%-ը`
պարտադիր սոցիալական ապահովութեան վճարների, 0,6%-ը` պաշտօնական
դրամաշնորհների, 3,7%-ը` այլ եկամուտների հաշուին: «Հայաստանի
Հանրապետութեան 2008 թուականի պետական բիւջէի մասին» ՀՀ օրէնքի
9-րդ յօդուածի 18-րդ կէտին համապատասխան պետական բիւջէում ներառվել
են նաեւ պետական հիմնարկների արտաբիւջէտային ֆոնդերի միջոցները,
որոնց եկամուտները հաշուետու ժամանակահատուածում կազմել են աւելի քան
13,5 մլրդ դրամ` նախորդ տարուայ 10,4 մլրդ դրամի դիմաց: