2008 Թ.-Ի ՀՈՒՆՎԱՐ-ՀՈԿՏԵՄԲԵՐԻՆ ՆԱԽՈՐԴ ՏԱՐՎԱ ՆՈՒՅՆ
ԺԱՄԱՆԱԿԱՀԱՏՎԱԾԻ ՀԱՄԵՄԱՏ ՀՀ ՊԵՏԲՅՈՒՋԵԻ ԵԿԱՄՈՒՏՆԵՐՆ ԱՃԵԼ ԵՆ
22,4%-ՈՎ, ԻՍԿ ԾԱԽՍԵՐԸ` 25,4%-ՈՎ
27-11-2008 04:02:00 | Հայաստան | Տնտեսություն
ԵՐԵՎԱՆ, 27 ՆՈՅԵՄԲԵՐԻ, ՆՈՅՅԱՆ ՏԱՊԱՆ: 2008թ.-ի թվականի
հունվար-հոկտեմբերին ՀՀ պետբյուջեի եկամուտները կազմել են ավելի
քան 625 մլրդ դրամ (ավելի քան 2 մլրդ 43,4 մլն ԱՄՆ դոլար), իսկ
ծախսերը` 614,2 մլրդ դրամ, որոնց գծով տարեկան ծրագրային
ցուցանիշների կատարումը ապահովվել է, համապատասխանաբար, 81,3%-ով
եւ 77,2%-ով:
Ըստ ՀՀ Ֆինանսների նախարարության լրատվական ծառայության,
նախորդ տարվա նույն ժամանակահատվածի համեմատ պետական բյուջեի
եկամուտներն ավելացել են 22,4%-ով կամ շուրջ 114,5 մլրդ դրամով,
իսկ ծախսերը` 25,4%-ով կամ 124.5 մլրդ դրամով: Ընդ որում, 25,2%-ով
կամ 103,7 մլրդ դրամով ավելացել են հարկերը եւ տուրքերը, 18,3%-ով
կամ 13 մլրդ դրամով` պարտադիր սոցիալական ապահովության վճարները,
168,2%-ով կամ 2,2 մլրդ դրամով` պաշտոնական դրամաշնորհները, իսկ
այլ եկամուտները (նախկինում` ոչ հարկային եկամուտներ) նվազել են
16,1%-ով կամ 4,4 մլրդ դրամով: Արդյունքում եկամուտների կազմում
1,8 տոկոսային կետով աճել է հարկերի եւ տուրքերի, 0,3 տոկոսային
կետով` պաշտոնական դրամաշնորհների տեսակարար կշիռը, իսկ պարտադիր
սոցիալական ապահովության վճարների եւ այլ եկամուտների տեսակարար
կշիռները նվազել են, համապատասխանաբար, 0,5 եւ 1,7 տոկոսային
կետով:
Պետական բյուջեի եկամուտների զգալի մասը` 79,3%-ը, ձեւավորվել
է հարկային մուտքերի հաշվին, 3%-ը` պետական տուրքի, 13,4%-ը`
պարտադիր սոցիալական ապահովության վճարների, 0,6%-ը` պաշտոնական
դրամաշնորհների, 3,7%-ը` այլ եկամուտների հաշվին: «Հայաստանի
Հանրապետության 2008 թվականի պետական բյուջեի մասին» ՀՀ օրենքի
9-րդ հոդվածի 18-րդ կետին համապատասխան պետական բյուջեում ներառվել
են նաեւ պետական հիմնարկների արտաբյուջետային ֆոնդերի միջոցները,
որոնց եկամուտները հաշվետու ժամանակահատվածում կազմել են ավելի քան
13,5 մլրդ դրամ` նախորդ տարվա 10,4 մլրդ դրամի դիմաց: