ՉԻՆԱՍՏԱՆՆ ԱՐԳԵԼՈՒՄ Է ԱՆՎՃԱՐ ՊՈԼԻԷԹԻԼԵՆԱՅԻՆ ՏՈՊՐԱԿՆԵՐ
ՏՐԱՄԱԴՐԵԼ ԳՆՈՐԴՆԵՐԻՆ
10-01-2008 20:00:00 | | Միջազգային
ՊԵԿԻՆ, 10 ՅՈՒՆՎԱՐԻ, ՆՈՅԵԱՆ ՏԱՊԱՆ: Չինաստանն արգելում է
խանութներում եւ հանրախանութներում անվճար պոլիէթիլենային
տոպրակներ տալ գնորդներին: Ինչպէս յայտնում է CNN-ը, վկայակոչելով
Չինաստանի կառավարութեանը, գնորդները ստիպուած կլինեն վճարել
այդպիսի տոպրակներ օգտագործելու համար:
Այս կարգը ուժի մէջ կմտնի յունիսի 1-ից եւ միտուած է կրճատելու
աղբի այդ մեծ աղբիւրը: Այսպիսի տոպրակներ արգելւում է օգտագործել
նաեւ հասարակական տրանսպորտում` աւտոբուսներում, գնացքներում,
ինքնաթիռներում, ինչպէս նաեւ օդանավակայաններում եւ տեսարժան
վայրերում:
Նոր կարգը խախտող ընկերութիւնները կը տուգանուեն: Հնարաւոր է
նաեւ նրանց ապրանքների առգրաւում: Խանութներին յանձնարարուել է
յստակօրէն նշել պոլիէթիլենային տոպրակների գինը, եւ ոչ թէ այն
ներառել այլ ապրանքների գնի մէջ:
Բնապահպանական կազմակերպութիւնները ողջունել են Չինաստանի
որոշումը, իսկ «Worldwatch Institute»-ի նախագահ Քրիստոֆեր
Ֆլեյվինն ասել է, որ Չինաստանն այս հարցում առաջ է անցել Միացեալ
Նահանգներից:
Չինացիները օրական մինչեւ 3 մլրդ պոլիէթիլենային տոպրակ են
օգտագործում: Յաճախ այդ տոպրակները միայն մէկ անգամ են
օգտագործւում:
Ըստ Չինաստանի կառավարութեան յայտարարութեյան` պոլիէթիլենային
տոպրակները, սպառողների համար յարմարաւետ լինելով հանդերձ,
հանգեցնում են ռեսուրսների անխնայ վատնման եւ շրջակայ միջավայրի
աղտոտման` չափազանց յաճախ օգտագործվելու, ինչպէս նաեւ վերամշակման
ցածր ծաւալների պատճառով: Խիստ բարակ տոպրակները, որոնք
հեշտութեամբ պատռվում են, այսպէս կոչուած «սպիտակ» աղտոտման
հիմնական աղբիւրն են: Ըստ երկրի կառավարութեան` պէտք է խրախուսել
մարդկանց, որ վերջիններս նորից սկսեն կտորից պատրաստուած տոպրակներ
եւ զամբյուղներ օգտագործել:
Նշենք, որ նմանատիպ կարգ գործում է Ուգանդայում,
Հարավաֆրիկեան Հանրապետութիւնում, Բանգլադեշում, ինչպէս նաեւ Սան
Ֆրանցիսկոյում: