ԱՌԱՋԻԿԱՅՈՒՄ ՅԱՅՏՆԻ ԴԵՐԱՍԱՆՆԵՐԻ ՄԱՍՆԱԿՑՈՒԹԵԱՄԲ ՏԵՂԻ ԿՈՒՆԵՆԱՅ
ՀԵՌՈՒՍՏԱՄԱՐԱԹՈՆ, ՈՐԻ ՀԱՍՈՅԹԸ ԿՏՐԱՄԱԴՐՈՒԻ ՀԹԳՄ ՀԻՄՆԱԴՐԱՄԻՆ
29-11-2007 18:55:00 | Հայաստան | Մշակոյթ
ԵՐԵՎԱՆ, 29 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Հայաստանի թատերական
գործիչների միութեան նախաձեռնութեամբ դեկտեմբերի 3-ին Գաբրիէլ
Սունդուկեանի անուան պետական ակադեմիական թատրոնում հայաստանեան
թատրոնների անուանի դերասանների մասնակցութեամբ կկայանայ
համերգ-հեռուստամարաթոն («Հ2» հեռուստաընկերությամբ), որից ստացուած
հասոյթը կփոխանցուի ՀԹԳՄ հիմնադրամին: Այս մասին «ՆՈՅԵԱՆ ՏԱՊԱՆ»-ի
թղթակցին յայտնեց ՀԹԳՄ նախագահ Յակոբ Ղազանչեանը:
Նրա խօսքերով, հիմնադրամի առաջնային եւ հիմնական նպատակն է
աջակցել թատրոնի մարդկանց ստեղծագործական գործունէութեանը:
Հիմնադրամի գումարներով կվերանորգվեն ՀԹԳՄ շէնքի վերջին հարկը եւ
դահլիճը: Հ.Ղազանչեանը նշեց, որ իւրաքանչիւր ռեժիսոր կամ դերասան
ցանկացած պահի կարող է օգտագործել բեմը` փորձերի կամ նոր
ներկայացումներ բեմադրելու համար: Բացի այդ, հիմնադրամը գումարներ
կտրամադրի երիտասարդ ռեժիսորներին` ներկայացումներ բեմադրելու
համար:
«Ներկայացում բեմադրելը լինելու է բացառապէս ազատ, ցենզուրա
չի լինելու: Պարզապէս տարբեր թատրոնների ներկայացուցիչներից
կստեղծուի յանձնաժողով, որն էլ կուսումնասիրի ներկայացուած ծրագրերն
ու կտրամադրի որոշակի գումար»,- ընդգծեց ՀԹԳՄ նախագահը:
Յետագայում, ըստ նրա, տարբեր ներդրողների կողմից, ինչպէս նաեւ
ակցիաների արդիւնքում գումարներ կփոխանցուեն հիմնադրամի հաշուին:
Նշենք, որ դեկտեմբերի 3-ին կայանալիք համերգ-հեռուստամարթոնի
տոմսերի արժէքը տատանւում է 2000-10000 դրամի սահմաններում:
Հ.Ղազանչեանը նշեց, որ վաճառուել են նաեւ 50 հատ 30000 դրամանոց
տոմսեր: