2010թ.-ին Հայաստանում 20%-ով աճել է ալկոհոլային խմիչքների
արտադրության ծավալը
04-02-2011 21:04:00 | Հայաստան | Տնտեսություն
ԵՐԵՎԱՆ, 4 ՓԵՏՐՎԱՐԻ, ՆՈՅՅԱՆ ՏԱՊԱՆ: 2010թ.-ին նախորդ տարվա
համեմատ Հայաստանից 56%-ով ավելացել է գինու արտահանումը, 16%-ով`
կոնյակինը, 5%-ով` օղունը եւ 40%-ով` սպիրտինը: Այս մասին փետրվարի
4-ի ասուլիսում հայտնել է Հայաստանի գինեգործների միության նախագահ
Ավագ Հարությունյանը: Արտահանման ընդհանուր ծավալը կազմել է 20%:
2010թ.-ին նախորդ տարվա համեմատ ալկոհոլային խմիչքների
արտադրության ծավալը ընդհանուր առմամբ աճել է 20 տոկոսով, այդ
թվում գինու արտադրությունը` 15%-ով, կոնյակինը` 28%-ով,
գարեջրինը` 42%-ով:
Հայ-վրացական բրենդային խնդիրների կապակցությամբ
Ա.Հարությունյանը նշեց, որ դեռ 3 տարի առաջ Հայաստանն իր նախնական
համաձայնությունն է տվել «Աշխարհագրական նշումների մասին»
հայ-վրացական պայմանագրի կնքմանը, եւ համոզմունք հայտնեց, որ այդ
փաստաթուղթը կարող է լուրջ վտանգ ներկայացնել: «Այդ փաստաթղթով
վրացիները մոտ 100 անուն աշխարհագրական նշում են պարտադրում
Հայաստանին: Այդ անվանումներից են, օրինակ, «Շիրակը», «Ալավերդին»,
«Կախեթը»: Եթե դա ընդունենք, ապա այդ նշումներով հայկական
ապրանքներն անգամ տրանզիտի իրավունք չեն ունենա Վրաստանի
տարածքով»,- ընդգծեց Ա.Հարությունյանը: