Ընթացքում են Վարդենիս-Մարտակերտ ավտոճանապարհի վերակառուցման աշխատանքները
17-06-2014 15:25:31 | Հայաստան | Տնտեսություն
Ընթացքում են Վարդենիս-Մարտակերտ շուրջ 116կմ երկարությամբ ավտոճանապարհի վերակառուցման աշխատանքները: Ճանապարհի 12 հատվածներում միաժամանակ ընթացող հողային աշխատանքները ներառում են ժայռային գրունտների պայթեցում, ճանապարհի հարթեցում, լայնացում, առկա ինժեներական կառուցվածքների տեղափոխում: Զուգահեռաբար տեղադրվում են ջրահեռացման խողովակներ, կառուցվում ափապաշտպան կառույցներ:
Տարեվերջին, հողային աշխատանքների ավարտին, երթեւկությունը հնարավոր եւ ժամանակային առումով նախընտրելի կարող է լինել նաեւ այն մարդատար մեքենաների համար, որոնք Հայաստանի հյուսիս-արեւմտյան շրջաններից ուղեւորվում են դեպի ԼՂՀ Մարտակերտի շրջան:
Ճանապարհի լիարժեք գործարկումը կաշխուժացնի կապը հայկական երկու հանրապետությունների միջեւ եւ կխթանի ճանապարհի երկայնքով տարածված շուրջ երկու տասնյակ համայնքների սոցիալ-տնտեսական կյանքը:
«Հայաստան» Համահայկական Հիմնադրամից հայտնում են, որ ավտոճանապարհի անվտանգ եւ լիարժեք գործարկումը հնարավոր կդառնա միայն ասֆալտապատումից եւ ճանապարհի կահավորումից հետո, ինչը նախատեսվում է իրականացնել Հեռուստամարաթոն 2014-ին հավաքագրվելիք միջոցներով:
ՀԱՅԵՐԵՆ
Русский
English
Դաս. հայերեն
French
