Պեկնում (ՉԺՀ) անցկացվում է ԶԼՄ-ների համագործակցության միջազգային համաժողով «Մեկ գոտի եւ մեկ ուղի»: Համաժողովի կազմակերպիչն է չինական «Ժենմին Ժիաբո» թերթը: Համաժողովի թեման է՝ «Համագործակցության նոր մոդելի հեռանկարները. Միասնական ճակատագիր ունեցող հանրությանն ընդառաջ»:
Համաժողովին հրավիրված են 200-ից ավելի ԶԼՄ-ների ներկայացուցիչներ՝ այդ թվում Հայաստանի երկու լրատվամիջոցի՝ «Առավոտ» օրաթերթի եւ «Նոյյան Տապան» Մեդիա Հոլդինգի ղեկավարներ՝ ՝ Արամ Աբրահամյանը եւ Տիգրան Հարությունյանը: Համաժողովի աշխատանքներին մասնակցում են նաեւ Չինաստանի քաղաքական գործիչներ, ճանաչված գիտնականներ եւ գործարարներ:
Ինչպես նշում են միջոցառման կազմակերպիչները, Համաժողովն ուղղված է «Մեկ գոտի եւ մեկ ուղի» նախաձեռնության ընկալմանը, որին հնարավոր կլինի հասնել մասնակիցների բազմակողմանի քաննարկումների արդյունքում այնպիսի հարցերի շուրջ, ինչպիսիք են արդյունաբերության ոլորտում համագործակցությունը, ֆինանսական ինովացիաներ եւ համագործակցություն, համագործակցություն զբոսաշրջության ոլորտում:
Համաժողովի շրջանակներում քննարկվում են հարցեր՝ կապված նոր մեդիա կառույցների ստեղծման համատեքստում ավանդական ԶԼՄ-ների առջեւ ծառացած մարտահրավերների, ինչպես նաեւ նորություններ ստեղծող ինտեգրված կազմակերպություններ կառուցելու ռազմավարությունների հետ:
Համաժողովն իր աշխատանքները կավարտի սեպտեմբերի 23-ին: