Օրերս Ռուսաստանի հայկական կազմակերպություններից մեկի՝ «հայերի միության» նախագահ Արա Աբրահամյանը Գիտությունների Ազգային Ակադեմիայում տրված մամուլի ասուլիսի ժամանակ հայտարարեց, որ Հայաստանում կուսակցություն է ստեղծելու և մասնակցելու է խորհրդարանական ընտրություններին:
Այդ ասուլիսում զավեշտն անպակաս էր: Այդպես, օրինակ գիտության «օջախում» ասուլիս տվող Աբրահամյանը, պարզվեց, դժվար է պատկերացնում «ռուս» և «ռուսաստանցի» բառերի տարբերությունը… Այդ և բազմաթիվ այլ հայտարարություններ համացանցում դարձան համընդհանուր ծիծաղի առարկա:
Սակայն մի կողմ թողնելով ասուլիսի զավեշտը, քննարկենք դրա բովանդակային էությունը:
Ապօրինի կուսակցությու՞ն
Արա Աբրահամյանը, ինչպես հայտնի է, Ռուսաստանի (միայն Ռուսաստանի) քաղաքացի է: Հայաստանի օրենսդրությունը («Կուսակցությունների մասին» ՀՀ օրենքի 3-րդ հոդվածը) հստակ արգելում է օտարերկրացիներին անդամակցել կուսակցություններին (իսկ կուսակցություն հիմնելու մասին անգամ խոսք լինել չի կարող): Ավելին, այդ արգելքը հստակ ամրագրում է, թե գործող սահմանադրությամբ (հոդված 28), թե նոր առաջարկվող սահմանադրության նախագծով (հոդված 46):
Ավելին, «Կուսակցությունների մասին» օրենքը (25-րդ հոդվածի 3-րդ մասը) հստակ արգելում են կուսակցություններին այլ պետությունների քաղաքացիներից որևէ դրամական աջակցություն ստանալ: Ընդ որում, օտարերկրյա ֆիզիկական ու իրավաբանական անձանցից աջակցություն ստացած կուսակցությունները պարտավոր են այդ գումարը փոխանցել պետական բյուջե… Հակառակ պարագայում այդ գումարը կարող է բռնագանձվել, իսկ կուսակցությունը՝ կրել լուրջ պատասխանատվություն:
Հետևապես անհասկանալի է, թե ի՞նչ է ենթադրում Արա Աբրահամյանի՝ Հայաստանում կուսակցություն բացելու անօրինական մտադրությունը, քանի որ ինքը ոչ կարող է կուսակցություն բացել, ոչ էլ կարող է իր մերձավորների կողմից բացված որևէ կուսակցություն ֆինանսավորել:
ԱԺ-ի դռները փակ են
Եթե անգամ պատկերացնենք, որ կուսակցություն բացելու նպատակով Արա Աբրահամյանը դիմի և «արագացված» կարգով ստանա Հայաստանի քաղաքացիություն, միևնույնն է, նա չի կարող մասնակցել Ազգային Ժողովի ընտրություններին:
Բանն այն է, որ նոր սահմանադրության նախագծով ԱԺ պատգամավոր կարող է դառնալ վերջին 4 տարում ՀՀ-ում մշտապես բնակվող և նույն ժամանակահատվածում միմիայն ՀՀ քաղաքացի հանդիսացող անձը (հոդված 48): Իսկ գալիք խորհրդարանական ընտրությունները 2017 թվականի մայիսին են լինելու, այն է՝ մեկուկես տարուց:
Հետևապես նաև անհասկանալի է դառնում՝ Արա Աբրահամյանի՝ գալիք խորհրդարանական ընրություններին մասնակցելու մտադրությունը:
Պուտինը մեր նախագահն է
Սակայն էլ ավելի մտահոգիչ է այն, որ Հայաստանում կուսակցություն բացելու և խորհրդարանում խմբակցություն ունենալու մտադրության մասին է հայտնում մեկը, ով համարում է, որ «Պուտինը միշտ ճիշտ ա, հանձնարարությունները տալիս ա, ես էլ կատարում եմ»:
Այսինքն, ըստ Արա Աբրահամյանի մտադրության, Հայաստանի Ազգային Ժողովում կլինի մի խմբակցություն, որն իր նախագահ է համարելու այլ պետության ղեկավարի և կատարելու է նրա հանձնարարությունները:
ՀԱՅԵՐԵՆ
Русский
English
Դաս. հայերեն
French
