«Ռեժիմը ցանկանում է դատաստան տեսնել Փաշինյանի հետ»,- հայտարարում է ՀԱԿ-ի համակարգողը <br />


«Ռեժիմը ցանկանում է դատաստան տեսնել Փաշինյանի հետ»,- հայտարարում է ՀԱԿ-ի համակարգողը

  • 12-11-2010 20:24:00   | Հայաստան  |  Քաղաքական
ԵՐԵՎԱՆ, 12 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայ Ազգային Կոնգրեսի համակարգող Լեւոն Զուրաբյանը գոհ է ՀԱԿ-ի վերջին հանրահավաքի արդյունքներից, քանի որ այն աչքի է ընկել մարդաշատությամբ եւ մասնակիցների ակտիվությամբ: Ինչպես նա նշեց նոյեմբերի 12-ի ասուլիսում, դա աշնանային ամենամեծ հանրահավաքն էր, որի մարդաշատությունը պայմանավորված էր Հայաստանում տիրող սոցիալ-քաղաքական ծանր իրավիճակով, ժողովրդի դժգոհության աճով: Լ.Զուրաբյանը նշեց, որ չնայած տեղեկատվական շրջափակմանը, ՀԱԿ-ը լուրջ աշխատանքներ է իրականացնում. Կոնգրեսի ներկայացուցիչները հանդիպումներ են ունենում ժողովրդի հետ եւ ծանոթացնում իրենց ծրագրերին, հետագա անելիքներին: Անդրադառնալով ՀՀ Ազգային Ժողովի «ԲՀԿ» խմբակցության անդամ Վարդան Բոստանջյանի այն հայտարարությանը, թե գալիք խորհրդարանական ընտրություններում «Բարգավաճ Հայաստան»-ը հավակնում է ձայների 99,9 տոկոսին, Լ.Զուրաբյանն ասաց. «Եթե այսպես շարունակվի, նրանք կհավակնեն ստանալ 101 տոկոս ձայն»: Ինչ վերաբերում է ՀՀԿ-ԲՀԿ հակասությունների մասին լուրերին, ապա, ՀԱԿ-ի համակարգողի խոսքերով, կոալիցիայում «կան գզվռտոցներ»: «Կոշ» քրեակատարողական հիմնարկում պահվող «Հայկական ժամանակ» օրաթերթի գլխավոր խմբագիր Նիկոլ Փաշինյանի նկատմամբ բռնության կիրառման փաստի առնչությամբ Լ.Զուրաբյանը նկատեց, որ «սա առաջին դեպքը չէ, երբ իշխանությունը բռնություն է գործադրում քաղբանտարկյալների նկատմամբ»: Նրա խոսքերով, իշխանությունները հասկանում են, որ Ն.Փաշինյանից հնարավոր չէ ներման խնդրագիր պահանջել եւ ցանկանում են լռեցնել նրան, ինչպես եւ «Հայկական ժամանակ»-ին, որի կողմից վերջերս շատ լուրջ բացահայտումներ են արվել: «Ռեժիմը ցանկանում է դատաստան տեսնել Ն.Փաշինյանի հետ, ինչը նրանց չի հաջողվի»,- հայտարարեց Լ.Զուրաբյանը` հավելելով, որ իրենք օգտագործում են բոլոր լծակները Ն.Փաշինյանի անվտանգությունն ապահովելու համար:
Նոյյան տապան  -   Քաղաքական

https://s1.merlive.am/Noian_Tapan/embed.html?autoplay=false&play