32 գիտական խմբեր ստացել են 5000 դոլարի չափով դրամաշնորհներ
27-01-2016 18:33:13 | Հայաստան | Գիտություն եւ տեխնոլոգիաներ
Կենսաբանության, ֆիզիկայի, քիմիայի, աստղագիտության, հայագիտության եւ այլ ոլորտներում գիտական հետազոտություններ իրականացրած հայաստանցի 107 գիտնականներից բաղկացած 32 գիտական խմբեր հունվարի 17-ին 5000 դոլարին համարժեք դրամի չափով դրամաշնորհներ ստացան Հայ օգնության ֆոնդից: Գիտական խմբերի ղեկավարներից 18-ը մինչև 35 տարեկան երիտասարդներ են, 13-ը՝ կանայք: Հաղթողներին ընտրել է ԱՄՆ-ում գործող փորձագիտական հանձնախումբը:
ՀՕՖ-ի հովանու ներքո գործող Գիտության և կրթության հայկական ազգային հիմնադրամը (ԳԿՀԱՀ/ANSEF [ansef.org]) դրամաշնորհները տրամադրում է 2000 թվականից:
Մրցույթին, որ այս տարի ներկայացված է եղել 244 գիտական հայտ, իսկ անցած 16 տարիների ընթացքում ԳԿՀԱՀ հետազոտական խորհրդ են ներկայացվել մոտ 2000 դիմում-առաջարկներ, որոնցից դրամաշնորհներ են ստացել 404 գիտական խմբեր` բաղկացած 1545 գիտնականերից: Ծրագրի դրամաշնորհային ընդհանուր գումարը կազմել է 2 մլն 20 հազար դոլար:
ՀՕՖ-ի գիտական ու կրթական ծրագրերի ղեկավար Էդուարդ Կարապետյանի խոսքերով` այս տարիների ընթացքում Գիտության և կրթության հայկական ազգային հիմնադրամն իր ուրույն տեղն է գտել Հայաստանում գիտության զարգացմանն աջակցող կազմակերպությունների շարքում:
Հայկական աստղագիտական ընկերության համանախագահ, Բյուրականի աստղադիտարանի առաջատար գիտաշխատող, արդեն 6-րդ անգամ ԳԿՀԱՀ դրամաշնորհ ստացած Արեգ Միքայելյանի գնահատմամբ` Գիտության և կրթության հայկական ազգային հիմնադրամի մոտեցումը դրամաշնորհներին շատ ճկուն է, ինչը հնարավորություն է տալիս գիտնականներին առավելագույն արդյունքի հասնել։
Ի լրումն ԳԿՀԱՀ-ի տրամադրած դրամաշնորհների, ՀՀ նախագահի հովանու ներքո իրականացվող երիտասարդ գիտնականների աջակցության ծրագրի և Հայաստանի երիտասարդական հիմնադրամի համագործակցության շնորհիվ այս տարի 5 դրամաշնորհ է տրամադրվել երիտասարդ գիտնականների ղեկավարությամբ գործող հետազոտական խմբերին: