Երևանում մեկնարկել է «Հայաստան-Իրան» գործարար համաժողովը, որն ուղղված է երկու երկրների միջև առևտրատնտեսական կապերի ամրապնդմանը: Համաժողովին, որը  կազմակերպվել է Իրանի Իսլամական Հանրապետության նախագահ Հասան Ռոհանիի՝ ՀՀ կատարած պաշտոնական այցի շրջանակներում, մասնակցում է 170 գործարար՝ որոնցից շուրջ 90-ը ԻԻՀ-ից, այդ թվում՝ հայազգի ձեռներեցներ։ Գործարարների թվում են ֆինանսական, բանկային, սննդի վերամշակման, ոսկերչության, դեղագործության և այլ որորտների մի շարք ներկայացուցիչներ:

 

Համաժողովի ընթացքում Իրանի Իսլամական Հանրապետության էներգետիկայի նախարարի խորհրդական Հոմայուն Հայերին երկու կարևոր հանգամանք առանձնացրեց, որոնք, նրա գնահատմամբ, կարող են նպաստել հայ-իրանական տնտեսական համագործակցության զարգացմանը: Ըստ նրա, առաջին նախապայմանը երկկողմ ներդումների աջակցության և տարբեր ցուցահանդեսների միջոցով երկու երկրների միջև առևտրային արտաշրջանառության ծավալների մեծացումն է, իսկ երկրորդը՝ Հյուսիս-հարավ միջանցիկ ավտոճանապարհի և Պարսից ծոցից-Սև ծով երկաթգծի կառուցումն է, որը «նոր էջ կբացի հայ-իրանական տնտեսական համագործակցության ոլորտում»:

Հայաստանի արդյունաբերողների և գործարարների միության նախագահ Արսեն Ղազարյանը կոչ արեց Իրանից ժամանած գործարարներին ՀՀ-ում ներդրումներ կատարելու շանսը բաց չթողնել. «Հայաստանում մենք ունենք չօգտագործված արտադրական ռեսուրսներ և ներդրումային քաղաքականությունը կարգավորող բարենպաստ իրավական ռեժիմներ, ինչը կարող է նպաստել երկու երկրների միջև եղբայրական հարաբերությունների բարելավմանը կոնկրետ արտադրությունների տեսքով»: Ա. Ղազարյանը նաև գոհունակություն հայտնեց, Իրանի՝ որպես տարանցիկ երկրի կողմից  Հայաստանին տրված մեծ արտոնությունների վերաբերյալ: Նրա խոսքերով՝ յուրաքանչյուր ապրանքատեսակ, որն արտադրվում է Հայաստանում, առանց ավելորդ լարվածությունների և մաքսային քաշքշուկների Իրանի միջոցով հեշտությամբ արտահանվում է արտերկիր:

Նոյյան տապան  -   Հասարակություն