Վարչապետը մեկ ամիս ժամանակ տվեց նավթամթերքի ոլորտում չարաշահումները վերացնելու համար
16-03-2017 11:22:39 | Հայաստան | Հասարակություն
ՀՀ կառավարության մարտի 16-ին կայացած նիստի օրակարգին անցնելուց առաջ վարչապետ Կարեն Կարապետյանն հանդես եկավ հանձնարարականներով, որոնցից առաջինը վերաբերում էր մատակարարվող նավթամթերքի որակին:
Ըստ նրա՝ կառավարության կողմից իրականացված ուսումնասիրությունների արդյունքում ի հայտ են եկել խնդիրներ բենզինի և դիզելային վառելիքի որակի հետ կապված:
«Նշված խնդիրները հաճախ պայմանավորում են վառելիքի տեսակների ոչ հստակ տարանջատմամբ, ինչպես նաև գործնականում առկա որոշակի բացերով, արդյունքում էական վնաս է պատճառվում սպառողներին և շուկային»,- ասաց Կ. Կարապետյանը:
Բենզինի, դիզելային վառելիքի և այլ վառելանյութերի վաճառքի ոլորտում չարաշահումների վերացման և որակի վերահսկողության գործառույթներն առավել արդյունավետ իրականացնելու նպատակով՝ գործադիրի ղեկավարը ՀՀ տնտեսական զարգացման և ներդրումների նախարարին հանձնարարեց մեկամսյա ժամկետում ՀՀ կառավարության աշխատակազմ ներկայացնել առաջարկություն, համապատասխան թույլտվություններ՝ ըստ վառելիքի տեսակների հստակ տարանջատման վերաբերյալ, հաշվի առնելով ներքին շուկայում դրանց սպառման փաստացի կառուցվածքը:
Կ. Կարապետյանը նաև հնաձնարարեց ՀՀ պետական եկամուտների կոմիտեի հետ համատեղ քննարկել և մշակել այս ոլորտում առկա խնդիրները վեր հանելու և կանխարգելելու հստակ մեթոդաբանություն:
ՀԱՅԵՐԵՆ
Русский
English
Դաս. հայերեն
French
