Արարատի մարզ կատարած աշխատանքային այցի շրջանակում ՀՀ առողջապահության նախարար Լևոն Ալթունյանը մարզպետ Արամայիս Գրիգորյանի հետ ծանոթացել է Արտաշատի բժշկական կենտրոնի շինարարության ընթացքին։ Արտաշատի տարածաշրջանի ավելի քան 90 հազար բնակչի սպասարկող եռահարկ կենտրոնը, որ գտնվում էր անբարեկարգ վիճակում, հիմնանորոգվում և արդիականացվում է Հայաստանի Հանրապետության նախագահ Սերժ Սարգսյանի հանձնարարականով` Համաշխարհային բանկի կողմից ֆինանսավորվող «Հիվանդությունների կանխարգելում և վերահսկում» ծրագրի շրջանակներում։
Տեղում քննարկվել են կենտրոնի ծառայությունների միավորման, տարածքն առավել արդյունավետ օգտագործման և այլ հարցեր։ Նախարար Ալթունյանը կենտրոնի տնօրենին առաջարկել է նախարարության մասնագետների հետ ևս մեկ անգամ մանրամասն քննարկել բոլոր դետալները, որպեսզի շահագործման ժամանակ թեկուզ փոքր խնդիրներ չլինեն։
Կենտրոնի հիմնական մասնաշենքի հիմնանորոգման աշխատանքները մեկնարկել են 2016 թվականի օգոստոսին։ Արդեն իրականացվել է շինարարական աշխատանքների շուրջ 35%-ը:
Շինարարական աշխատանքներն իրականացնող կազմակերպության ղեկավարը նախարարին վստահեցրել է, որ աշխատանքները այսուհետև ևս կշարունակվեն առանց ժամանակացույցից շեղվելու։
Նշենք, որ շինարարական աշխատանքների ավարտը նախատեսված է 2018 թվականի սեպտեմբերին։ Ծրագրի շրջանակներում Արտաշատի բժշկական կենտրոնը կհագեցվի ժամանակակից բժշկական սարքավորումներով, կահույքով և պարագաներով: Նախատեսված է իրականացնել նաև կենտրոնի արտաքին բարեկարգումը։
ՀԱՅԵՐԵՆ
Русский
English
Դաս. հայերեն
French
