Հունիսի 28-ին և 29-ին Հայկական Կարմիր խաչի ընկերությունը (ՀԿԽԸ) Առաջին օգնության դասընթաց անցկացրեց Մասիսի զարգացման հիմնադրամի Երիտասարդական կենտրոնի կամավորների համար: Մասիսի զարգացման հիմնադրամը հիմնադրվել է Adibekyan Family Foundation for Advancement (АFFA) բարեգործական կազմակերպության կողմից՝ նպաստելու համար քաղաքի սոցիալական, տնտեսական և մշակութային զարգացմանը:
Մասիսի զարգացման հիմնադրամը և Հայկական Կարմիր խաչի ընկերությունը հայտարարեցին համագործակցություն և Մասիս քաղաքի երիտասարդների համար համատեղ սկսեցին իրականացնել ուսումնական ծրագրեր:
Համագործակցության շրջանակներում Հայկական Կարմիր խաչի ընկերության մասնագետները Մասիսի զարգացման հիմնադրամի Երիտասարդական կենտրոնի մասնակիցների համար անցկացրեցին առաջին դասընթացը, որը նվիրված էր Առաջին օգնության հմտություններին:
«Մենք ուրախ ենք Հայկական Կարմիր խաչի ընկերության հետ համագործակցության համար: Մեր կազմակերպություններն իրենց գործունեությամբ շատ ընդհանրություններ ունեն. Մասիսի զարգացման հիմնադրամի նպատակն է բարելավել սոցիալապես խոցելի խմբերի կյանքն՝ անկախ ազգությունից, սեռից, նյութական կարգավիճակից և քաղաքական հայացքներից: Մենք հատուկ ուշադրություն ենք դարձնում երիտասարդական նախաձեռնությունների աջակցությանը: Այդ իսկ պատճառով մեր համագործակցությունը Հայկական Կարմիր խաչի հետ սկսվեց Երիտասարդական կենտրոնի կամավորների ուսուցումից»,-ողջունելով դասընթացի մասնակիցներին՝ նշեց Մասիսի Զարգացման հիմնադրամի գործադիր տնօրեն Ստեփան Հովհաննիսյանը:
«Առաջին օգնության երկօրյա դասընթացներին Մասիսի զարգացման հիմնադրամի Երիտասարդական կենտրոնի կամավորներին տեսական գիտելիքների փոխանցման և գործնական հմտությունների ցուցադրման միջոցով սովորեցրեցինք, թե ինչպես ճանաչել արտակարգ իրավիճակը, ինչպես արձագանքել և առաջին օգնություն ցուցաբերել արյունահոսության, ոսկրամկանային տարբեր կոտրվածքների, այրվածքների, թունավորումների, փափուկ հյուսվածքների և այլ վնասվածքների դեպքում: Հանդիպումների ընթացքում կատարվել են վնասված հատվածների վիրակապման, սրտի աշխատանքի և շնչառության վերականգնման, անգիտակից տուժածների հետ աշխատանքի և այլ տեսակի վարժություններ:»,- իր խոսքում նշեց Հայկական Կարմիր Խաչի ընկերության Առաջին օգնության հրահանգիչ Աստղիկ Աթանյանը:
Աստղիկ Աթանյանն իր խոսքում հավելեց, որ հաճելի էր նման խմբի հետ աշխատելը, քանի որ պատանիները շատ գիտակ էին և լի խանդավառությամբ. ակտիվ հարցուպատասխանի միջոցով մասնակցում էին թե´տեսական, թե´ գործնական պարապմունքներին:
Մասիսի զարգացման հիմնադրամի Երիտասարդական կենտրոնի կամավոր Էդուարդ Պետրոսյանը կիսվեց դասընթացի մասին իր տպավորություններով.
«Հանդիպումը շատ ինֆորմատիվ էր և հետաքրքիր: Դպրոցում, դպրոցից դուրս կարդացել էի գրականություն, սակայն այս դասընթացը, բացի գիտելիքներից, պրակտիկ աշխատանքների միջոցով հնարավորություն տվեց նաև ձեռք բերել փորձ: Հիմա ավելի հանգիստ եմ, քանի որ արտակարգ իրավիճակների դեպքում արդեն տիրապետում եմ առաջին քայլերին, գիտեմ ինչպես վարվել և, ինչու չէ, անհարժեշտության դեպքում նաև կյանք փրկել»:
****
Մասիսի զարգացման հիմնադրամը շահույթ չհետապնդող կազմակերպություն է՝ հիմնադրված 2015 թվականին Adibekyan Family Foundation for Advancement բարեգործական կազմակերպության կողմից՝ Մասիս քաղաքի զարգացումը խթանելու նպատակով։ Հիմնադրամի գործունեության նպատակն է միավորել բնակիչներին Մասիս քաղաքի կյանքի որակի բարելավման գործընթացի շուրջ և ձևավորել ակտիվ ու մտահոգ քաղաքացիների նոր սերունդ, որն ապագայում իր ավանդը կունենա Հայաստանի զարգացման և բարգավաճման գործում:
2016 թվականին Հիմնադրամը ստեղծել է Մասիսի երիտասարդական կենտրոնը քաղաքի երիտասարդների նախաձեռնությունների զարգացման համար՝ աջակցելով արդեն առկա, այնպես էլ նոր ծրագրերի իրականացմանը:
Մասիսի զարգացման հիմնադրամի գործունեության մասին առավել մանրամասն կարող եք ծանոթանալ www.ilovemasis.com կայքում:
Հայկական Կարմիր խաչի ընկերությունը (ՀԿԽԸ), լինելով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է Շարժման հիմնարար սկզբունքներով և հանդիսանում է կառավարությանն օժանդակ կառույց` մարդասիրական ոլորտում: ՀԿԽԸ-ի առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց:
Հայկական Կարմիր խաչի ընկերության մասին առավել մանրամասն կարող եք ծանոթանալ www.redcross.am կայքում