Երևան-Սևան մայրուղին փակել էին Սևանի բաժնի ոստիկանների ձերբակալման պատճառով, այս պահին երթևեկությունը կարգավորված է. Ոստիկանություն.Tert.am
20-10-2018 12:30:13 | Հայաստան | Ի՞նչ է գրում մամուլը
Այս պահին Երևան-Սևան ճանապարհը բաց է, երթևեկությունը կարգավորված է: Այս մասին Tert.am-ի հետ զրույցում ասաց ՀՀ ոստիկանության լրատվական վարչության ԶԼՄ-ների հետ կապի բաժնի պետ Էդգար Ջանոյանը` նշելով, որ ավելի վաղ Սևանի բաժնի ոստիկանների ձերբակալման պատճառով ոստիկանների հարազատները փակել էին ճանապարհը:
«Բացատրական աշխատանքներ են տարվել հարազատների հետ, այս պահին ճանապարհը բաց է»,-ասաց նա և նշեց, որ տեղում է եղել նաև փոխոստիկանաապետ Աղասի Կիրակոսյանը:
Հիշեցնենք, որ ՀՀ հատուկ քննչական ծառայությունում հարուցված քրեական գործի շրջանակներում ՀՀ քրեական օրենսգրքի 309.1-րդ հոդվածի 2-րդ մասի 4-րդ կետով նախատեսված հանցավոր արարք կատարելու կասկածանքով ձերբակալվել են ՀՀ ոստիկանության Գեղարքունիքի մարզային վարչության Սևանի բաժնի քրեական հետախուզության բաժանմունքի պետն ու նույն բաժանմունքի երկու օպերլիազորները:
Վերջիններս կասկածվում են ՀՀ ոստիկանության Սևանի բաժնում խմբի կազմում Ա. Մ.-ին խոշտանգելու մեջ:
Ա. Մ.-ն ՀՀ հատուկ քննչական ծառայություն դիմում էր ներկայացրել այն մասին, որ 2018 թվականի հոկտեմբերի 7-ին ոստիկանության Սևանի բաժնի երեք աշխատակից Սևան քաղաքում գործող բուքմեյքերական գրասենյակի մոտից իրեն տեղափոխել են ոստիկանության Սևանի բաժին և ծեծի ենթարկել:
ՀԱՅԵՐԵՆ
Русский
English
Դաս. հայերեն
French
