«Մայքրոսոֆթ»-ը Հայաստանում սկսում է իր «BizSpark» ծրագիրը
18-03-2009 21:00:00 | Հայաստան | Տնտեսություն
ԵՐԵՎԱՆ, 18 ՄԱՐՏԻ, ՆՈՅՅԱՆ ՏԱՊԱՆ: «Մայքրոսոֆթ» ընկերության
հայաստանյան մասնաճյուղ «Մայքրոսոֆթ Ար Էյ» (Microsoft RA)
ընկերությունը Հայաստանում սկսել է տեղեկատվական տեխնոլոգիաների
ձեռնարկությունների զարգացմանն ուղղված «BizSpark» ծրագիրը, որի
իրականացման գործընկերն է «Ձեռնարկությունների ինկուբատոր»
հիմնադրամը: Ինչպես մարտի 18-ի ասուլիսում նշեց «Մայքրոսոֆթ Ար
Էյ»-ի տնօրեն Գրիգոր Բարսեղյանը, ծրագրի շրջանակներում
համակարգչային ծրագրավորման ոլորտում գործող սկսնակ
ձեռնարկություններին եւ ծրագրավորողների խմբերին կտրամադրվի արագ
մուտքի (express access) հնարավորություն դեպի «Մայքրոսոֆթ»-ի
տեխնոլոգիաները եւ գործիքները, որոնք հնարավոր կլինի օգտագործել
համակարգչային արտադրանքի նախագծման, տեստավորման, ցուցադրման
նպատակով: Բացի այդ, հայկական «BizSpark»-ին մասնակից սկսնակ
ընկերությունները կունենան «Մայքրոսոֆթ» ցանցի գործընկերներին եւ
միջազգային հանրությանը ներկայանալու, «Մայքրոսոֆթ Ար Էյ»-ից
տեխնոլոգիաների մշակման եւ ծառայությունների մատուցման գծով
խորհրդատվությոն ստանալու հնարավորություն:
Գ.Բարսեղյանի խոսքերով, «Մայքրոսոֆթ»-ը «BizSpark»
նախաձեռնությունն սկսել է իրականացնել 2008թ.-ի դեկտեմբերից, եւ
ներկայումս նախաձեռնության աշխատանքներում ներգրավված են աշխարհի
շուրջ 60 երկրներ:
«Ձեռնարկությունների ինկուբատոր» հիմնադրամի տնօրեն Բագրատ
Ենգիբարյանը Հայաստանում «BizSpark»-ի իրականացումը կարեւորեց այն
հանգամանքով, որ ծրագիրը կնպաստի ծրագրավորման պատվերների
կատարումից դեպի ամբողջական ծրագրային արտադրանքի ստեղծմանն
անցնելուն: