Հայաստանի վարչապետը այցելել է «Վաղարշ եւ որդիներ» ՍՊԸ-ին
պատկանող ոսկու շուկա
26-01-2009 17:00:00 | Հայաստան | Տնտեսություն
ԵՐԵՎԱՆ, 26 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի վարչապետ
Տիգրան Սարգսյանը էկոնոմիկայի, ֆինանսների, աշխատանքի եւ
սոցիալական հարցերի նախարարների, Պետական եկամուտների կոմիտեի
նախագահի եւ մի շարք այլ պետական պաշտոնյաների ուղեկցությամբ
հունվարի 24-ին այցելել է «Վաղարշ եւ որդիներ» ՍՊԸ-ին պատկանող`
Երեւանի Խորենացու փողոցի վրա գտնվող ոսկու շուկա` ծանոթանալու
շուկայում աշխատող մարդկանց աշխատանքային պայմաններին եւ
դժգոհություններին, որոնք պարբերաբար արտահայտվում են
կառավարության շենքի դիմաց նրանց բողոքներով:
Ոսկու շուկայում շրջայցի եւ շուկայի բազմաթիվ աշխատակիցների
հետ զրույցների արդյունքում պարզվել է, որ աշխատողների համար
ապահովված չեն տարրական աշխատանքային պայմաններ, բազմաթիվ խնդիրներ
կան` սանիտարահիգիենիկ, առողջապահական, հակահրդեհային
անվտանգության ապահովման եւ այլ առումներով, ինչը նաեւ
օրենդրության կոպիտ խախտում է: Շուկայում խնդիրներ կան նաեւ
կապված ՀԴՄ-ների հետ` բազմաթիվ առեւտրի տաղավարներում դրանք
բացակայում են: Աշխատակիցները դժգոհել են շուկայում իրենց
ընդհանուր գործունեության համար ամսական մեծ չափի գումարի
վճարումից. այցելած տաղավարների պարագայում այդ գումարը ամսական
նվազագույնը կազմել է շուրջ 70 հազար դրամ, որից միայն 18 հազար
դրամն է իբրեւ հարկ վճարվում պետությանը եւ եւս 5 հազար դրամը`
կենսաթոշակային հիմնադրամին, մնացածը` շուկայի կազմակերպչին տարբեր
ծառայությունների` տեղի վարձակալության, հաշվապահության եւ այլ
ծառայությունների դիմաց տրվող վճարներն են:
Տեղում մարդկանց
հարցադրումներին ի պատասխան պարզաբանվել է, որ տոնավաճառների հետ
կապված օրենսդրական վերջին փոփոխությունները միտված են հարկային
բեռը հատկապես աշխատողների համար թեթեւացնելու` այն տեղափոխելով
տոնավաճառի, շուկայի կազմակերպչի վրա: Շուկայի կազմակերպիչը
պարտավոր է իր հաշվին գնելու ՀԴՄ-ներ եւ տեղադրելու առեւտրի
տաղավարներում, ինչպես նաեւ` ապահովելու օրենքով նախատեսված
աշխատանքային պայմաններ:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ կառավարության
Տեղեկատվության եւ հասարակայնության հետ կապերի վարչությունից,
շրջայցից հետո, ՀՀ վարչապետը հրավիրել է խորհրդակցություն` այցի
արդյունքներն ամփոփելու եւ արձանագրված խնդիրներին լուծումներ
տալու նպատակով: Ըստ այդմ` հանձնարարվել է ՀՀ կառավարությանն
առընթեր պետական եկամուտների կոմիտեի նախագահին` սեղմ ժամկետում
պատրաստել «Վաղարշ եւ որդիներ» ՍՊԸ-ին պատկանող ոսկու շուկայի
ամբողջ գործունեության ֆինանսական արդյունքների, վարձակալական
վճարների եւ հարկային պարտավորությունների վերաբերյալ
վերլուծություն եւ այդ տեղեկանքը ներկայացնել ՀՀ վարչապետին:
Մեկ այլ հանձնարարականի համաձայն, ՀՀ Աշխատանքի եւ սոցիալական
հարցերի նախարարության Աշխատանքի տեսչությունը պետք է
ուսումնասիրություններ անցկացնի շուկայում` աշխատանքային
պայմանների խախտումները փաստացի արձանագրելու եւ օրենդրության
պահանջին համապատասխան միջոցներ ձեռնարկելու նպատակով: Արտակարգ
իրավիճակների նախարարությանն էլ հանձնարարվել է ուսումնասիրել
շուկայում տեխնիկական պահանջների, այդ թվում` հակահրդեհային
անվտանգության ապահովման մասով վիճակը եւ անհրաժեշտ միջոցներ
ձեռնարկել օրենսդրության պահանջների կատարման ուղղությամբ:
Այս ամենի արդյունքում, ըստ կառավարության ղեկավարի, պետք է
բարենպաստ պայմաններ ապահովվեն շուկաներում, տոնավաճառներում
բազմաթիվ աշխատակիցների համար` ինչպես ֆինանսատնտեսական, այնպես էլ
աշխատանքային պայմանների բարելավման առումով: