«Հայաստան» համահայկական հիմնադրամն ավարտել է Լոռու մարզի
Ապավեն գյուղի նոր ջրատարի կառուցման ծրագիրը
21-01-2009 18:40:00 | Հայաստան | Հասարակություն
ԵՐԵՎԱՆ, 21 ՀՈՒՆՎԱՐԻ, ՆՈՅՅԱՆ ՏԱՊԱՆ: Լոռու մարզի Ապավեն
գյուղի համար տարեսկիզբը նշանավորվեց նոր ջրատարի շահագործմամբ:
Ծրագիրն իրականացվել է «Հայաստան» համահայկական հիմնադրամի
Մոնրեալի տեղական մարմնի հովանավորությամբ: Ինչպես «ՆՈՅՅԱՆ
ՏԱՊԱՆ»-ին հայտնեցին «Հայաստան» համահայկական հիմնադրամից, ջրատարի
կառուցման արժեքը կազմել է շուրջ 32 մլն ՀՀ դրամ (մոտ 103 հազար
ԱՄՆ դոլար):
Այժմ նորակառույց ջրամբարից խմելու ջուրը գյուղ է հասնում 620
մետր երկարությամբ արտաքին գծով, որին կից կառուցվել է նաեւ
ջրամատակարարման ներքին ցանց` 1200 մ ընդհանուր երկարությամբ: Այս
ջրատարի շնորհիվ գյուղի յուրաքանչյուր տան ծորակից արդեն հոսում է
լեռնային աղբյուրի մաքուր ջուր:
Ըստ «Հայաստան» հիմնադրամի գործադիր տնօրենի պաշտոնակատար Արա
Վարդանյանի, հիմնադրամը յուրաքանչյուր գյուղում ծրագրեր
իրականացնելիս առաջնություն է տալիս տվյալ համայնքի համար հույժ
կարեւոր խնդրի լուծմանը, ինչի հերթական ապացույցն Ապավենի ջրատարի
կառուցումն է: