Եղվարդում նախատեսվում է կառուցել լճափնյա հանգստավայրեր
16-12-2008 21:00:00 | Հայաստան | Տնտեսություն
ԵՐԵՎԱՆ, 16 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 16-ին
Զարգացման հայկական գործակալությունում (ԶՀԳ) քննարկվեց «ԷՄ ՋԻ ԷՄ
ՄԻՌԱԺ» ընկերության կողմից ներկայացված ներդրումային ծրագիրը, որի
համաձայն նախատեսվում է մինչեւ 2014թ.-ը Եղվարդում կառուցել Մասիս,
Սիս եւ Նոր Հայաստան լճափնյա հանգստավայրեր: Ծրագրի ղեկավար Արմեն
Վարդանյանը հայտնեց, որ այս նախագիծը արժանացել է ՀՀ Էկոնոմիկայի
նախարարության, պետական այրերի հավանությանը: Ըստ նրա, ծրագիրը
հնարավորություն կտա Հայաստանում զարգացնել ոչ միայն միջազգային,
այլեւ ներքին զբոսաշրջությունը:
Ներկայացնելով նախագիծը, Ա.Վարդանյանը նշեց, որ առաջին հերթին
պետք է վերսկսել Եղվարդի ջրամբարի կառուցումը, որը դադարեցվել էր
խորհրդային իշխանության փլուզումից հետո: Ըստ նրա, ջրամբարի
ափամերձ տարածքներից բացվում են հրաշալի տեսարաններ դեպի Արարատ,
Հայկական Պար, Արագած եւ Արա լեռները, ինչը տուրիզմի զարգացման
համար լավ նախադրյալ է:
Ա.Վարդանյանի խոսքերով, հյուրանոցային համալիրի արտաքին
կառուցվածը կրկնօրինակում է Սիսն ու Մասիսը, իսկ նրանց կողքին դեպի
վեր է խոյանում Նոր Հայաստան երկնաքեր կառույցը: 1000 հա մակերեսով
ջրամբարի ափին կառուցված այս համալիրում նախատեսվում է 2,5 հազար
անհատական սեփականություն հանդիսացող հյուրանոցային համարներ:
Ա.Վարդանյանը հայտնեց, որ ամբողջ համալիրի եւ ջրամբարի
շինարարության համար անհրաժեշտ է 300 մլն ԱՄՆ դոլար, որից 100
մլն-ը` ջրամբարի կառուցման համար: Ըստ նրա, անհատական համարների
գնորդներին ներդրողների կողմից կառաջարկվի ֆինանսավորում. 50 հազ.
դոլար կանխավճար, 20 տարվա մարման ժամկետ` 10,5% տարեկան
տոկոսադրույքով: Գնորդը անձամբ կվճարի միայն 6 տարի, որից հետո այն
կվճարվի գնորդի սեփականությունը հանդիսացող հյուրանոցային համարի
վարձակալությունից ստացված եկամուտներից: Այսպիսով, գնորդը կվճարի
ընդամենը 120 հազ. դոլար: Ա.Վարդանյանը վստահեցնում է, որ այդ
աշխատանքները սկսելու համար կպահանջվի 100 մլն դոլար, որից հետո
կօգտագործվեն համարների վաճառքից ստացված ֆինանսական հոսքերը:
Ա.Վարդանյանը նշեց, որ ջրամբարի եւ միջազգային չափանիշներին
համապատասխանող համալիրի շինարարությունը նախատեսվում է ավարտել
2014թ.-ը, որպեսզի 2015թ.-ին` Հայոց ցեղասպանության 100-ամյակին,
այնտեղ հյուրընկալվեն արտերկրից ժամանած հյուրերը: Նա միաժամանակ
հայտնեց, որ ԶՀԳ-ն հետ համագործակցության արդյունքում 2 խոշոր
ընկերություններ ծրագրով հետաքրքրված են: «Մենք դիմում ենք նաեւ ՀՀ
կառավարությանը, որպեսզի ծրագիրը ներկայացվի ներդրողներին»,- ասաց
Ա.Վարդանյանը:
Քննարկմանը ներկա ՀՀ էկոնոմիկայի փոխնախարար Արա Պետրոսյանը
նշեց, որ այս նախագիծը 2 անգամ քննարկվել է նախարարությունում: Ըստ
նրա, նախագծի իրականացումով հնարավոր կլինի Հայաստանում զարգացնել
այլընտրանքային, մասնավորապես, ջրային տուրիզմը: