Հաշմանդամների խնդիրներին նվիրված խորհրդարանական լսումներում
արված առաջարկները կփոխանցվեն պատկան մարմիններին
17-06-2010 21:08:00 | Հայաստան | Քաղաքական
ԵՐԵՎԱՆ, 17 ՀՈՒՆԻՍԻ, ՆՈՅՅԱՆ ՏԱՊԱՆ: Հաշմանդամների խնդիրներին
նվիրված հունիսի 17-ի խորհրդարանական լսումներում արված
առաջարկները կփոխանցվեն ԱԺ պատգամավորներին, կոալիցիայի անդամերին,
ՄԱԿ-ի Զարգացման ծրագրի ազգային փորձագետներին, ՀՀ Մարդու
իրավունքների պաշտպանի գրասենյակին եւ հաշվի կառնվեն հետագա
քննարկումներում: Այս մասին հավաստիացրել են լսումները նախաձեռնած
ՀՀ ԱԺ Եվրոպական ինտեգրման հարցերի եւ Մարդու իրավունքների
պաշտպանության ու հանրային հարցերի մշտական հանձնաժողովների
նախագահներ Նաիրա Զոհրաբյանը եւ Արամ Սաֆարյանը:
Լսումների թեման էր հաշմանդամություն ունեցող անձանց իրավական
եւ սոցիալ-հոգեբանական կարգավիճակի վերաբերյալ Հայաստանի մարդու
իրավունքների պաշտպանի աշխատակազմի փորձագիտական խմբի կողմից
պատրաստած հետազոտությունը:
Ըստ ԱԺ-ի պաշտոնական կայքէջի, հիմնական զեկուցող, Հայաստանի
մարդու իրավունքների պաշտպանի գրասենյակի ներկայացուցիչ Ռուստամ
Մախմուդյանը նշել է, որ հաշմանդամություն ունեցող անձանց կողմից ՀՀ
Մարդու իրավունքների պաշտպանին հասցեագրված դիմում-բողոքներում
առաջ քաշված հիմնախնդիրները վկայում են, որ հաշմանդամություն
ունեցող անձինք շատ հարցերում ծանոթ չեն հաշմանդամների վերաբերյալ
ՀՀ օրենսդրությանը: Մարդու իրավունքների պաշտպանին հասցեագրված
դիմում-բողոքների ուսումնասիրության արդյունքում ՄԻՊ-ի գրասենյակի
կողմից օրենսդրության խախտումներ չեն արձանագրվել եւ մատնանշել են
խնդրի լուծման իրավական եղանակները:
ՀՀ աշխատանքի եւ սոցիալական հարցերի փոխնախարար Ջեմմա
Բաղդասարյանը,որպես ոլորտում պետության վարած քաղաքականության
կարեւորագույն ուղղություններ, նշել է հաշմանդամ երեխաներին
մատչելի կրթության ապահովման, հաշմանդամների զբաղվածության եւ
սոցիալական ձեռնարկությունների ստեղծման խնդիրները:
Լսումներին մասնակցած ՀԿ-ների ներկայացուցիչներն իրենց
ելույթներում անդրադարձել են տրանսպորտի հետ կապված խնդիրներին եւ
առաջարկել այն մատչելի դարձնել հաշմանդամների համար: Ուշադրություն
է հրավիրվել նաեւ այն հանգամանքի վրա, որ հաշմանդամները
ընտրություններին չեն կարողանում մասնակցել ընտրատարածքներում
թեքահարթակներ չլինելու պատճառով: Անդրադարձ է եղել նաեւ մտավոր
խնդիրներ ունեցող հաշմանդամ երեխաների դաստիարակությանը,
կրթությանը, զինվորական ծառայությանը, ընտրական իրավունքի
իրացմանը, հաշմանդամների զբաղվածությանն առնչվող խնդիրների:
Կարեւորվել է հաշմանդամ երեխաների համար համապատասխան
մարզադպրոցների ստեղծումը: