Գրիգորյանի մայրը 120 հազար հոգու հետ միասին շրջափակման մեջ է, ասում են՝ դուք արցախցիներին մենակ եք թողել. Ռուբինյան
20-12-2022 18:39:28 | Հայաստան | Ի՞նչ է գրում մամուլը
armtimes.com 2020 թվականի նոյեմբերի 9-ի հայտարարությամբ Լաչինի միջանցքը չի գտնվում ո՛չ ԼՂ ՊԲ, ո՛չ ՀՀ ԶՈՒ վերահսկողության ներքո։ Այն գտնվում է ՌԴ խաղաղապահ զորակազմի ներքո։
Այս մասին այսօր Ազգային ժողովի արտահերթ նիստում ասաց ԱԺ նախագահի տեղակալ Ռուբեն Ռուբինյանը՝ անդրադառնալով ընդդիմադիր պատգամավորների և գործիչների կողմից Լաչինի միջանցքի փակման վերաբերյալ տարբեր հայտարարություններին։
«Օրերս Սերժ Սարգսյանն էր ասում՝ կարո՞ղ եք ցույց տալ՝ ռուս խաղաղապահները ի՞նչ գործառույթներ ունեն, այսօր պարոն Մինասյանն է ասում՝ ի՞նչու եք պատասխանատվությունը փոխադրում ուրիշների վրա։ Հիշեցնում եմ նոյեմբերի 9-ի հայտարարության 6-րդ կետը՝ Լաչինի միջանցքը հինգ կիլոմետր լայնությամբ, որն ապահովելու է Լեռնային Ղարաբաղի կապը Հայաստանի հետ և շրջանցելու է Շուշի քաղաքը, մնում է ռուս խաղաղապահ զորակազմի վերահսկողության ներքո: Նաև ասվում է, որ Ադրբեջանի Հանրապետությունը երաշխավորում է Լաչինի միջանցքով քաղաքացիների և տրանսպորտային միջոցների ու բեռների երկու ուղղություններով տեղաշարժի անվտնագությունը»,- ասաց Ռուբինյանը։
Վերջինս նաև անդրադարձավ ընդդիմադիր պատգամավոր Գեղամ Մանուկյանի հնչեցրած հայտարարությանը, որով Մանուկյանը ԱԽ քարտուղար Արմեն Գրիգորյանին մեղադրել էր արցախահայությունից հրաժարվելու համար․ «Գրիգորյանը, գիտեք, ղարաբաղցի է, որի մայրը ապրում է Ղարաբաղում և 120 հազար հոգու հետ միասին շրջափակման մեջ է, ասում է՝ դուք արցախցիներին մենակ եք թողել, հրաժարվում եք Ղարաբաղից։ Լուրջ ե՞ք ասում»։
Ռուբինյանը կրկին հիշեցրեց՝ Լաչինի միջանցքը անմիջականորեն պետք է վերահսկեն ռուսական խաղաղապահ զորքերը։ Ստեղծված իրավիճակն էլ պետք է հանգուցալուծվի հետևյալ կերպ. «Ադրբեջանը պետք է դադարի խախտել նոյեմբերի 9-ի հայտարարության 6-րդ կետը, և ՌԴ խաղաղապահ զորակազմը պետք է վերականգնի իր ուղիղ վերահսկողությունը Լաչինի միջանցքի նկատմամբ։ Եթե համաձայն եք, ասեք՝ այո՛, բայց մի ասեք՝ «իշխանությունն է համար մեկ պատսխանատուն», իշխանությունն է փորձում պատասխանատվությունը գցել այլոց վրա»: