Խաղաղապահների միջոցով Արցախում հանդիպելու առաջարկ է փոխանցվել Ադրբեջանին
11-04-2023 11:50:29 | Հայաստան | Ի՞նչ է գրում մամուլը
Հայկական ժամանակ. Արցախի Հանրապետության իշխանությունները Ռուսաստանի Դաշնության խաղաղապահ առաքելության միջոցով, վերջիններիս տեղակայման վայրում և զորախմբի հրամանատարության միջնորդությամբ հանդիպում անցկացնելու առաջարկ են փոխանցել ադրբեջանական կողմին՝ հումանիտար բնույթի անհետաձգելի հարցեր քննարկելու համար։
Այս մասին հայտնում է Արցախի տեղեկատվական շտաբը:
Ավելի վաղ հայտնել էինք, որ Ադրբեջանի նախագահի աշխատակազմը երկրորդ անգամ հանդիպման է հրավիրել Ղարաբաղի հայ համայնքի ներկայացուցիչներին՝ շարունակելու շփումները «վերաինտեգրման», ինչպես նաև Ղարաբաղում ենթակառուցվածքային ծրագրերի իրականացման հարցը քննարկելու համար։
Առաջարկվել էր հանդիպում անցկացնել Բաքվում։
Ի պատասխան Ադրբեջանի և Արցախի ներկայացուցիչների միջև հանդիպում անցկացնելու մասին՝ Ադրբեջանի Հանրապետության նախագահի աշխատակազմի առաջարկի՝ Արցախի ԱԳՆ-ից հայտնել էին, որ Արցախի Հանրապետությունը հավատարիմ է նախկինում հայտնած իր դիրքորոշմանն առ այն, որ նման հանդիպումներ կարող են տեղի ունենալ ՌԴ խաղաղապահների միջնորդությամբ նույն վայրում, ինչպես ս.թ. մարտի 1-ին, հումանիտար, ենթակառուցվածքային, տեխնիկական հարցերի շուրջ, առանց դրանց անհարկի քաղաքականացման:
Արցախում կողմերի հանդիպում նախկինում եղել է ռուսական խաղաղապահ զորակազմի հրամանատարության միջնորդությամբ և մասնակցությամբ մարտի 1-ին: