Վան նահանգի հայկական եկեղեցիները վերանորոգվելու են
22-02-2010 18:28:00 | Թուրքիա | Մշակույթ
ՎԱՆ, 15 ՓԵՏՐՎԱՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Թուրքիայի Վան
նահանգի հայկական եկեղեցիները վերանորոգվելու են: Այդ մասին
երկուշաբթի օրը հայտնել է Վանի փոխնահանգապետ Հալիլ Բերքը:
Փոխնահանգապետը «Անադոլու» լրատվական գործակալությանը ասել է, թե
կառավարության նախապատրաստած ծրագրի շրջանակներում վերանորոգվելու
են Վանա լճի կղզիներում գտնվող եկեղեցիները: Վանա լճում չորս կղզի
կա, ներառյալ Աղթամարը: Յուրաքանչյուր կղզում եկեղեցի կա:
Վերանորոգված է միայն Աղթամար կղզու եկեղեցին: Չարփանաք կղզու եւ
Յուքարի Բաքրաշլի գյուղի եկեղեցիները նույնպես վերանորոգվելու
են»,- ասել է փոխնահանգապետը` նշելով, որ եկեղեցիների
վերանորոգումը կնպաստի նահանգում տուրիզմի զարգացմանը: Յուքարի
Բաքրաշլի գյուղում Վարագավանք համալիրը 7 եկեղեցի է ընդգրկում:
Հինավուրց Սուրբ Սոֆիա եկեղեցին կառուցվել է 8-րդ դարում:
Չարփանաքի եկեղեցին կառուցվել է 6-րդ դարում, վերանորոգվել է 1462
թվականին: Բայց 1703 թվականի երկրաշարժից եկեղեցին տուժել է եւ
կրկին վերանորոգվել 1712-1720 թվականներին: