ՅՈՒԼՅԱ ՏԻՄՈՇԵՆԿՈ. ՅՈՒՇՉԵՆԿՈՆ ՎՏԱՆԳԻ Է ԵՆԹԱՐԿՈՒՄ
ՌՈՒՍ-ՈՒԿՐԱԻՆԱԿԱՆ ՀԱՐԱԲԵՐՈՒԹՅՈՒՆՆԵՐԸ
08-09-2008 16:34:00 | Ուկրաինա | Միջազգային
ԿԻԵՎ, 8 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ուկրաինայի վարչապետ
Յուլյա Տիմոշենկոն բրիտանական «Ֆայնենշլ թայմս» թերթին տված
հարցազրույցում հայտարարել է, որ երկրի նախագահ Վիկտոր Յուշչենկոն
վտանգի է ենթարկում երկկողմ հարաբերությունները Ռուսաստանի հետ`
միեւնույն ժամանակ նրան պատասխանատու համարելով Ռադայում
կոալիցիայի փլուզման համար:
Բրիտանական «Ֆայնենշլ թայմսի» հարցազրույցում Տիմոշենկոն նշել
է, որ իրեն անվանելով կրեմլյան գաղտնի գործակալ կոալիցիայի
փլուզման ժամանակ` Վիկտոր Յուշչենկոն վտանգի է ենթարկել ինչպես
երկկողմ հարաբերությունները Ռուսաստանի հետ, այնպես էլ Ուկրաինայի
արեւմտյան ինտեգրացումը:
Ուկրաինայի վարչապետը հերքել է նախագահի այն մեղադրանքները,
թե անցած ամիս Վրաստանի եւ Ռուսաստանի միջեւ հակամարտության
ժամանակ ինքը փաստացի եղել է Կրեմլի կողմում եւ թույլ գտնվել
Վրաստանին սատարելու հարցում: