ԲԱՂԴԱԴՈՒՄ ԱՀԱԲԵԿՉԱԿԱՆ ԳՈՐԾՈՂՈՒԹՅԱՆ ՀԵՏԵՎԱՆՔՈՎ ԶՈՀՎԵԼ Է 47 ՄԱՐԴ
28-07-2008 16:18:00 | Իրաք | Միջազգային
ԲԱՂԴԱԴ, 28 ՀՈՒԼԻՍԻ, ՆՈՅՅԱՆ ՏԱՊԱՆ: Բաղդադում ուխտագնացների
վրա մահապարտ ահաբեկիչների իրականացրած հարձակման հետեւանքով
զոհվել է 47 եւ մարմնական տարբեր աստիճանի վնասվածքներ ստացել
ավելի քան 70 մարդ:
Ինչպես հաղորդում է BBC-ն` վկայակոչելով ոստիկանության
տեղեկատվությունը, կին ահաբեկիչների իրականացրած հարձակման զոհ են
դարձել շիա-մահմեդականներ, որոնք գնում էին Իրաքի մայրաքաղաքի
հյուսիսում գտնվող Կադիմիա շրջանի սուրբ վայրերը:
Պայթյունները որոտացել են այն պահին, երբ ուխտավորների թափորը
անցնում էր մայրաքաղաքի կենտրոնական Կարրադա շրջանով:
Նշվում է նաեւ, որ կիրակի յոթ ուխտագնացներ են սպանվել զինված
մարդկանց կողմից Բաղդադի արվարձաններից մեկում: