ՀՀ ԱԺ-Ն ԱՊՐԻԼԻ 10-ԻՆ ՎԱՎԵՐԱՑՐԵՑ 2 ՄԻՋԱԶԳԱՅԻՆ ՊԱՅՄԱՆԱԳՐԵՐ
10-04-2008 16:05:00 | Հայաստան | Տնտեսություն
ԵՐԵՎԱՆ, 10 ԱՊՐԻԼԻ, ՆՈՅՅԱՆ ՏԱՊԱՆ: ՀՀ Ազգային Ժողովը ապրիլի
10-ի առավոտյան նիստում վավերացրեց ապրիլի 8-ին քննարկված 2
միջազգային պայմանագրեր.
- 1973թ.-ի մարտի 3-ին Վաշինգտոնում ստորագրված եւ 1979թ.-ի
հունիսի 22-ին Բոննում լրամշակված «Անհետացման եզրին գտնվող վայրի
կենդանական ու բուսական աշխարհի տեսակների միջազգային առեւտրի
մասին» կոնվենցիան,
- Հայաստանի Հանրապետության եւ Ասիական զարգացման բանկի միջեւ
2007թ.-ի դեկտեմբերի 18-ին ստորագրված «Ջրամատակարարման եւ
ջրահեռացման վեկտորի ծրագիր» վարկային համաձայնագիրը:
Վերջինով ծրագրի իրականացման համար ՀՀ-ին տրամադրվում է 45
մլն ԱՄՆ դոլարին համարժեք վարկ: Վարկի մարումն իրականացվելու է
2016-2039թթ.-ին` տարեկան 1 տոկոս տոկոսադրույքով վարկի մարման
արտոնյալ ժամանակահատվածում, իսկ այնուհետեւ` տարեկան 1,5 տոկոս,
որը ենթակա է հաշվարկման վարկային հաշվից ստացված վարկի եւ տարբեր
ժամանակահատվածներում չմարված գումարների նկատմամբ: