ՀՀ ԿԱՌԱՎԱՐՈՒԹՅԱՆ ՄՈՏ ԲՈՂՈՔԻ ԱԿՑԻԱ ԷԻՆ ԿԱԶՄԱԿԵՐՊԵԼ ՄԱՀԱՑԱԾ
ԺԱՄԿԵՏԱՅԻՆ ԶԻՆԾԱՌԱՅՈՂՆԵՐԻ ԾՆՈՂՆԵՐԸ
19-06-2008 19:05:00 | Հայաստան | Հասարակություն
ԵՐԵՎԱՆ, 19 ՀՈՒՆԻՍԻ, ՆՈՅՅԱՆ ՏԱՊԱՆ: Ժամկետային զինվորական
ծառայության ընթացքում մահացած զինվորների ծնողները հունիսի 19-ին
բողոքի ակցիա էին կազմակերպել ՀՀ կառավարության շենքի մոտ «Մի
սպանեք մեր զինվորներին» գրությամբ պաստառով եւ իրենց որդիների
լուսանկարներով: Նրանք լրագրողների հետ զրույցում հայտարարեցին, որ
չափազանց դժգոհ են իրենց զավակների մահվան հանգամանքների քննության
արդյունքներից, պահանջում են գտնել ու պատժել մեղավորներին:
Հավաքվածների հետ զրուցեց ՀՀ պաշտպանության նախարար Սեյրան
Օհանյանը: Նա հավաստիացրեց, որ պատկան մարմինները զբաղվում են
նշված զինվորների մահվան հանգամանքների բացահայտմամբ: Նախարարը
առաջարկեց գրավոր դիմել նախարարությանը, հեռախոսի համարներ տվեց
ցուցարարներին եւ խոստացավ մոտ ապագայում պատասխանել նրանց
հարցերին:
ՀՀ կառավարության աշխատակազմի ներկայացուցիչը հավաքվածներին
հայտնեց, որ նույն օրը ՀՀ գլխավոր դատախազությունում նրանց հետ
պատրաստ է հանդիպել գլխավոր դատախազ Աղվան Հովսեփյանը: Սակայն,
ցուցարարները հրաժարվեցին այդ հանդիպումից: