ԿՈՍՈՎՍԿԱ-ՄԻՏՐՈՎԻՑԱՅԻ ԱՆԿԱՐԳՈՒԹՅՈՒՆՆԵՐԻ ԺԱՄԱՆԱԿ ՀԱՐՅՈՒՐԻՑ
ԱՎԵԼԻ ՄԱՐԴ Է ՏՈՒԺԵԼ
17-03-2008 19:30:00 | | Միջազգային
ՊՐԻՇՏԻՆԱ, 17 ՄԱՐՏԻ, ՆՈՅՅԱՆ ՏԱՊԱՆ: Կոսովսկա-Միտրովիցա
քաղաքում անկարգությունների ընթացքում տարբեր աստիճանի ծանրության
վերքեր են ստացել հարյուրից ավելի մարդ, հաղորդել են բելգրադյան
ԶԼՄ-ները:
Տեղի հիվանդանոցից ստացված հաղորդումների համաձայն, ներկա
պահի դրությամբ այնտեղ ընդունել են մոտ յոթանասուն տուժածների:
Նրանցից 15-ի վիճակը համարվում է ծանր:
Հայտնի է նաեւ KFOR ռազմական առաքելության ֆրանսիական
զորակազմից ութ տուժածների, ՄԱԿ-ի քաղաքացիական առաքելության
ոստիկանության ուկրաինական ստորաբաժանումից` 13 եւ 23 լեհ
ոստիկանների մասին:
ՄԱԿ-ի քաղաքացիական առաքելության ոստիկանության հատուկ ուժերի
(UNMIK) աշխատակիցները, ինչպես նաեւ KFOR զինծառայողները
երկուշաբթի վաղ առավոտյան գրոհով վերցրել են Կոսովսկա-Միտրովիցայի
դատարանի շենքը, որը ուրբաթ օրվանից գրավել էին արդարադատության
սերբ աշխատողները: Կալանվածներին դուրս բերելու փորձի ժամանակ
քաղաքում սկսվել են զանգվածային անկարգություններ, որոնց
մասնակցում էին մի քանի հարյուր սերբեր:
Ինչպես հաղորդում է «Նովոստի» գործակալությունը, ՄԱԿ-ի
ոստիկանության հրամանատարությունը որոշում է ընդունել ոստիկաններին
դուրս բերել Կոսովսկա-Միտրովիցա քաղաքից: Այնտեղ կարգուկանոնը
կպահպանեն KFOR-ի զինծառայողները: Նշվում է նաեւ, որ ՄԱԿ-ի
առաքելությունը երկխոսություն է վարում Սերբիայի կառավարության
ներկայացուցիչների եւ Կոսովսկա-Միտրովիցայի սերբ ղեկավարների հետ
այնտեղ իրավիճակը կարգավորելու նպատակով: