ՓԵՏՐՎԱՐԻ 5-ԻՆ ՊԱՇՏՈՆԱՊԵՍ ԿԲԱՑՎԻ ԳԵՐՄԱՆԱԿԱՆ
«ՊՐՈԿՐԵԴԻՏԲԱՆԿ»-Ի ՀԱՅԱՍՏԱՆՅԱՆ ՄԱՍՆԱՃՅՈՒՂԸ
18-01-2008 20:00:00 | Հայաստան | Տնտեսություն
ԵՐԵՎԱՆ, 18 ՀՈՒՆՎԱՐԻ, ՆՈՅՅԱՆ ՏԱՊԱՆ: Փետրվարի 5-ին պաշտոնապես
կբացվի գերմանական «ՊրոԿրեդիԲանկ»-ի հայաստանյան մասնաճյուղը: Այս
մասին հունվարի 18-ի ասուլիսում հայտնեց Գերմանիայի պետական
«Վերականգնման վարկերի բանկի» (KfW-Kreditenschaft fur
Wiederaufbau) Հայաստանի ներկայացուցիչ Կարապետ Գեւորգյանը:
Նրա խոսքերով, Հայաստանի մասնաճյուղը, որի կապիտալի 17%-ը
պատկանելու է KfW-ին ու Վերակառուցման եւ զարգացման եվրոպական
բանկին, կլինի 23-րդը «ՊրոԿրեդիտԲանկ»-ի միջազգային ցանցում: Ըստ
Կ.Գեւորգյանի, դա կլինի առաջին դեպքը, երբ KfW-ն մասնաբաժին
կունենա Հայաստանում գործող բանկի կապիտալում:
KfW-ի ներկայացուցիչը նշեց, որ, ամենայն հավանականությամբ,
այդ բանկը 2009թ.-ի վերջից այլեւս չի ֆինանսավորի միջկառավարական
պայմանագրի հիման վրա իրականացվող «ՀՀ բնակարանային ֆինանսավորման
կայուն շուկայի զարգացման ծրագիրը»: Նախատեսվում է, որ արդեն
մասնավոր հիմունքներով KfW-ն փոքր եւ միջին բիզնեսի ու հիփոթեքային
վարկավորման համար վարկային միջոցներ կտրամադրի «ՊրոԿրեդիտԲանկ»-ի
հայկական մասնաճյուղին, հնարավոր է նաեւ Հայաստանում գործող այլ
բանկերի: Կ.Գեւորգյանը հիշեցրեց, որ արդեն 2006թ.-ին KfW-ն 10 մլն
դոլարի չափով վարկային միջոցներ է տրամադրել «ԱԿԲԱ-Կրեդի Ագրիկոլ»
բանկին: