ՀԱՋՈՂՈՒԹՅԱՄԲ Է ԱՆՑԵԼ ՀԱՅԱՍՏԱՆԻ ՄԱՍՆԱԿՑՈՒԹՅՈՒՆԸ ՍԵՊՏԵՄԲԵՐԻՆ
ՖՐԱՆՍԻԱՈՒՄ ԵՎ ՃԱՊՈՆԻԱՅՈՒՄ ԿԱԶՄԱԿԵՐՊՎԱԾ ԶԲՈՍԱՇՐՋԱՅԻՆ ՄԻՋԱԶԳԱՅԻՆ
ՑՈՒՑԱՀԱՆԴԵՍՆԵՐԻՆ
17-10-2007 20:00:00 | Հայաստան | Տնտեսություն
ԵՐԵՎԱՆ, 17 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Այս տարի Հայաստանն
առաջին անգամ մասնակցեց Ֆրանսիայի Դովիլ քաղաքում անցկացվող
«TopResa Travel Market Show» ամենամյա զբոսաշրջային միջազգային
ցուցահանդեսին: Ինչպես «ՆՈՅՅԱՆ ՏԱՊԱն»-ի թղթակցին հայտնեց
Զբոսաշրջության զարգացման հայկական գործակալության (ԶԶՀԳ)
ցուցահանդեսների համակարգող Գոհար Միրզոյանը, սեպտեմբերի 26-28-ին
ԶԶՀԳ-ի եւ հայաստանյան 4 տուրօպերատորների մասնակցությունն այդ
հեղինակավոր ցուցահանդեսին հնարավոր դարձավ Ֆրանսիայում Հայաստանի
տարվա միջոցառումների շրջանակներում:
Գ.Միրզոյանի խոսքերով, հաջողությամբ է անցել նաեւ Հայաստանի
4-րդ մասնակցությունը սեպտեմբերի 14-16-ին Տոկիոյում կայացած «JATA
World Travel Fair» զբոսաշրջային միջազգային ամենամյա
ցուցահանդեսին: ԶԶՀԳ-ն եւ հայաստանյան 4 տուրօպերատորներ
ներկայացրեցին զբոսաշրջության տեսանկյունից որպես գրավիչ երկիր
Հայաստանի մասին տեղեկատվական նյութերը: