ՏԵՂԻ ՈՒՆԵՑԱՎ ACP-Ի ԿՈՂՄԻՑ ԹՈՂԱՐԿՎՈՂ ՊԱՐՏԱՏՈՄՍԵՐԻ
ՏԵՂԱԲԱՇԽՄԱՆ ՇՆՈՐՀԱՆԴԵՍԸ
25-09-2007 21:10:00 | Հայաստան | Տնտեսություն
ԵՐԵՎԱՆ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 25-ին
Երեւանում տեղի ունեցավ անզուտ պղնձի արտադրությամբ եւ իրացմամբ
զբաղվող «Արմենիան քափըր փրոգրամ» (Armenian Copper Programme)
ՓԲԸ-ի կողմից թողարկվող պարտատոմսերի տեղաբաշխման շնորհանդեսը:
Պարտատոմսերի թողարկման կազմակերպիչն ու գլխավոր տեղաբաշխողը
«Արմսվիսբանկ»-ն է, որը երաշխավորել է պարտատոմսերի ամբողջ` 500
մլն դրամի (մոտ 1,47 մլն ԱՄՆ դոլար) չափով ծավալի տեղաբաշխումը:
Ըստ ACP-ի հիմնադիր «Վալլեքս գրուպ» ընկերության ֆինանսական
տնօրեն Գագիկ Արզումանյանի, պարտատոմսերի ընդհանուր ծավալի 80%-ը
տեղաբաշխվում է սինդիկատի միջոցով, որի կազմում ընդգրկվել են
«Արմսվիսբանկ»-ը, Զարգացման հայկական բանկը եւ «Ֆյուչր կապիտալ
մարկետ»-ը: Նրա խոսքերով, պարտատոմսերի մնացած 20%-ը նախատեսվում է
տեղաբաշխել բաժանորդագրության միջոցով` մասնակցության
հնարավորություն ընձեռելով նաեւ մյուս ներդրողներին:
Նշվեց, որ պարտատոմսերի անվանական արժեքը 50 հազար դրամ է,
քանակը` 10 հազար հատ, իսկ տարեկան տոկոսադրույքը` 10%:
ՀՀ Կենտրոնական բանկի նախագահ Տիգրան Սարգսյանի խոսքերով,
պարտատոմսերի թողարկումը, որպես արժեթղթերի շուկայի զարգացման
գործում առաջին քայլերից մեկը, նոր գործառույթ է ինչպես ոլորտի
մասնակիցների, այնպես էլ ՀՀ քաղաքացիների համար, որը ընդլայնում է
Հայաստանի ֆինանսական շուկայի հնարավորությունները: Նա հույս
հայտնեց, որ այդ օրինակին կհետեւեն նաեւ հայաստանյան այլ
ձեռնարկություններ, որոնք այլընտարանքային ֆինանսավորման կարիք
ունեն:
Նշենք, որ ACP-ն պարտատոմսեր թողարկող հայաստանյան 5-րդ
ձեռնարկությունն է` «Վալլետտա», «Շեն կոնցեռն», «Կասկադ»,
«Հայռուսգազարդ» ընկերություններից հետո: