ՊԱՐՈՆՅԱՆՑԻՆԵՐԸ ՆՈՐ ԹԱՏԵՐԱՇՐՋԱՆԸ ԿԲԱՑԵՆ ՉՎԵՐԱՆՈՐՈԳՎԱԾ ԵՎ
ԱՆՄԽԻԹԱՐ ՎԻՃԱԿՈՒՄ ԳՏՆՎՈՂ ՇԵՆՔՈՒՄ
06-09-2007 19:45:00 | Հայաստան | Մշակույթ
ԵՐԵՎԱՆ, 6 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հակոբ Պարոնյանի անվան
երաժշտական կոմեդիայի թատրոնի 65-րդ թատերաշրջանը կբացվի
սեպտեմբերի 7-ին «Ատամնաբույժն արեւելյան» ներկայացումով: Ինչպես
սեպտեմբերի 6-ի ասուլիսում հայտնեց թատրոնի գեղարվեստական ղեկավար
Երվանդ Ղազանչյանը, ներկայացումը նվիրվելու է «Ատամնաբույժն
արեւելյան» օպերետի առաջին բեմելի 70-ամյակին:
«70 տարի առաջ հայ թատրոնի դասական Վարդան Աճեմյանի
բեմադրությամբ թատրոնում առաջին անգամ ներկայացվեց «Ատամնաբույժն
արեւելյան» ներկայացումը: Իսկ Արտեմի Այվազյանի, Վարդան Աճեմյանի,
Էդուարդ Համբարձումյանի, Սվետլանա Գրիգորյանի եւ թատրոնի լեգենդ
Կարպ Խաչվանքյանի մասնակցությունը այդ բեմադրությունում վկայում է
թատրոնի հիմքի պրոֆեսիոնալ լինելը»,- նշեց Ե.Ղազանչյանը:
Ըստ նրա, թատրոնը հավատարիմ մնալով իր ավանդույթներին
խաղացանկը համալրել է հիմնականում հայ դասական եւ ժամանակակից
հեղինակների գործերով: Անդրադարնալով թատրոնի երիտասարդացման
խնդրին, Ե.Ղազանչյանը հայտնեց, որ վերջին 2 տարում 7 երիտասարդ
դերասաններ են ընդունվել խումբ: «Որ թատրոնում էլ աշխատել եմ, այն
բլոկադայի չեմ ենթարկել: Հիմա մեր թատրոնի ոչ միայն դռները, այլ
նաեւ պատուհաններն են բաց բոլոր այն երիտասարդ ռեժիսորների ու
դերասանների առջեւ, ովքեր կցանկանան մեզ մոտ աշխատել»,- հայտարարեց
թատրոնի ղեկավարը:
Անդրադառնալով թատրոնի շենքի վերանորոգման աշխատանքներին,
թատրոնի տնօրեն Կ.Շահբազյանը նշեց. «Այսօր Երեւան քաղաքում բացի
մեր թատրոնից չկա մեկը, որ վերանորոգված չլինի: 2002 թվականին, երբ
վերանորոգվում էին մշակութային օջախները, որոշվեց, որ մեր թատրոնը
պետք է գործի: 2 տարի օր ու գիշեր երաժշտական կոմեդիայի թատրոնը
սպասարկեց հանրությանը: Այդ ծանրաբեռնվածությունն էլ նպաստեց
բեմական մեխանիզացիայի ժամանակից շուտ շարքից դուրս գալուն»:
Կ.Շահբազյանը փաստեց, որ շենքային վատ պայմանների, ձմռանը
ջեռուցման բացակայության պատճառով ստիպված են լինում 2 անգամ
թատերաշրջանը բացել: «Այս տարի պետական բյուջեյից որոշակի գումար
էր հատկացվել տանիքի վերանորոգման համար: Սակայն վերանորոգման
աշխատանքները 15 օր է ընդհատված են, տանիքն էլ կիսատ է
վերանորոգված: Պատճառը նախագծային եւ նախահաշվային սխալն է, ու
հիմա չգիտենք, թե ինչ է լինելու քանդված տանիքի հետ»,- հավելեց նա: