ԿԱՐՄԻՐ ԽԱՉԻ ՄԻՋԱԶԳԱՅԻՆ ԿՈՄԻՏԵՆ ՆԱԽԱՏԵՍՈՒՄ Է ԻՐԱԿԱՆԱՑՆԵԼ
ԱՆՀԱՅՏ ԿՈՐԾԱՆԵՐԻ ԵՎ ՀԱՅՏՆԱԲԵՐՎԱԾ ԴԻԱԿՆԵՐԻ ՏՎՅԱԼՆԵՐԻ ՀԱՄԱԴՐՈՒՄ
06-09-2007 19:20:00 | Հայաստան | Հասարակություն
ԵՐԵՎԱՆ, 6 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Կարմիր Խաչի միջազգային
կոմիտեի Հայաստանյան առաքելության շրջանակներում նախատեսվում է
ազգային կառույցների օգնությամբ հավաքել անհայտ կորածների անձնական
տվյալները եւ համադրել հայտնաբերված դիակների ու աճյունների հետ:
Այս մասին սեպտեմբերի 5-ին ՀՀ գլխավոր դատախազ Աղվան Հովսեփյանի
հետ հանդիպման ժամանակ հայտնել է Կարմիր Խաչի Միջազգային կոմիտեի
Հայաստանի պատվիրակության ղեկավար Ջեյմս Ռեյնոլդսը: Նա հույս է
հայտնել, որ այդպիսով հնարավորություն կստեղծվի անհայտ կորածների
ճակատագրի մասին նոր տեղեկատվություն ստանալ:
Ըստ ՀՀ գլխավոր դատախազության հաղորդագրության, Աղվան
Հովսեփյանը պատրաստակամություն է հայտնել աջակցել ծրագրի
իրականացմանը` Կարմիր Խաչի միջազգային կոմիտեին տրամադրել
դատախազությունում նման դեպքերի առթիվ հարուցված քրեական գործերում
առկա տեղեկատվությունը, իսկ անհրաժեշտության դեպքում աջակցել
արտաշիրիմում անցկացնելուն եւ դատաբժշկական փորձաքննությունների
իրականացմանը:
Գլխավոր դատախազը հավանություն է տվել նաեւ Հայաստանի
քրեակատարողական հիմնարկներում սոցիալ-հոգեբանական
ծառայությունների աջակցությանը նվիրված համաժողով անցկացնելու`
Կարմիր Խաչի նախաձեռնությանը: